Komisioni Evropian nënshkroi sot rishikimin e marrëveshjeve dypalëshe me Shqipërinë dhe Maqedoninë e Veriut për zbatimin e Planit të Përbashkët të Veprimit Anti-Terrorist për Ballkanin Perëndimor.
Qëllimi i marrëveshjes së rinovuar është forcimi i bashkëpunimit në fushën e luftimit të terrorizmit, parandalimit dhe luftimit të ekstremizmit të dhunshëm, tha Komisioni.
Marrëveshjet u nënshkruan nga Komisionerja për Punë të Brendshme, Ilva Johanson, Ministri i Punëve të Brendshme të Shqipërisë, Bledar Çuçi dhe Ministri i Punëve të Brendshme të Maqedonisë së Veriut, Oliver Spasovski.
“Kjo marrëveshje na mundëson bashkëpunim të ngushtë. Ajo që është e re në këto marrëveshje të rishikuara është mbrojtja e infrastrukturës kritike dhe rritja e gatishmërisë në rast të sulmeve terroriste. Komisioni do ta mbështesë financiarisht në fillim të vitit të ardhshëm”, tha Johanson.
Ky angazhim i shtuar në fushën e sigurisë është një nga gjashtë nismat kryesore të përshkruara në strategjinë e Komisionit për Ballkanin Perëndimor dhe është një përgjigje ndaj thirrjes nga Deklarata e Sofjes e majit 2018 për rritje të bashkëpunimit në luftën kundër terrorizmit dhe ekstremizmit.
Marrëveshjet e mëparshme me të dyja vendet janë nënshkruar në tetor 2019.
