Policia në Krushopek gjeti vetëm 1kg kokainë në një paketim bananesh, edhe pse ministri i Punëve të Brendshme, Naqe Çulev, tha se bëhet fjalë për sasi shumë më të madhe të kokainës, e cila stacion të fundit kishte vendin tonë. Kokaina ishte nga Kolumbia dhe sipas burimeve jozyrtare thuhet se ishte gjithsej 1.3 ton, por se ku ka përfunduar pjesa tjetër e kokainës ende nuk dihet.
“Në Krushopek është gjetur dhe sekuestruar vetëm një pjesë ose 1 kg kokainë, ku sipas informacioneve të para është vetëm një pjesë e një tërësie më të madhe që duhej të përfundonte në vendin tonë. Pas kryerjes së bastisjes janë privuar nga liria J.K. 31 vjeç shoferi nga Mali i Zi, S.E. 47 vjeç – pronari i firmës si pranuesi përfundimtar i mallit, J.E. 22 vjeç – djali i pronarit, R.I. 51 vjeç – magacioneri, të cilët ishin në magazinë përderisa shkarkohej malli”, deklaroi Çulev.
MPB njofton se gjatë bastisjes gjithashtu janë sekuestruar celularë, të holla në vlerë prej 3000 mije eurosh, 700 dollarë dhe 188 mije denarë, një automjet Iveco dhe 1980 paketa banane.
“Duke marrë parasysh se bëhet fjalë për një sasi të madhe, e cila sipas informacioneve destinacioni i fundit ishte vendi ynë, edhe njëherë theksohet rëndësia e grupeve kriminale maqedonase në hartën e tregut ndërkombëtar të kokainës. Në vendin tonë u kap vetëm një kilogram, e gjithë sasia tjetër është në shtet tjetër”, theksoi Çulev.
Në ditët në vijim Çulev tha se do të dale me detaje të fundit për sasinë e saktë të destinuar për vendin tonë dhe rrugën nëpër të cilin ka kaluar kamioni. Ai tha se hetimi do të vazhdojë për të gjetur rrjetin e trafikantëve. Sipas të dhënave të MPB-së kompania Baneks në periudhën e kaluar rreth 120 herë ka kryer import të frutave, pjesën më të madhe nga Kolumbia, ndërsa në sasi më të vogël edhe nga Ekuadori. Aksionin anti-kokainë i zhvilluar në Krushopek është si pjesë e aksionit ndërkombëtar për luftë kundër krimit të organizuar në të cilën ishin pjesëmarrës edhe forcat policore italiane, shqiptare po edhe DEA amerikane.
