Shqipëria regjistroi raste të reja të infeksioneve nga koronavirusi. Pas ndërprerjes së mësimit dhe ndalimit të mbajtjes së tubimeve publike deri më 3 prill, sot kopshtet dhe institucionet janë dezinfektuar plotësisht. Fluturimet për në Itali gjithashtu janë pezulluar.
Qeveria e Serbisë, ndërkohë, ka vendosur të ndalojë përkohësisht hyrjen e shtetasve të huaj, që vijnë nga zonat me transmetim intensiv të virusit korona. Atje deri paradite kishte katër persona të infektuar, ndërsa në Greqi shifra u rrit në më shumë se 80. Kryetari i Parlamentit Evropian David Sasoli, tha se ai është në vetizolim në shtëpinë e tij në Bruksel, si masë paraprake pasi kishte udhëtuar në Itali.
“Kovid 19 i detyron të gjithë të jenë të përgjegjshëm dhe të kujdesshëm. Parlamenti do të vazhdojë të kryejë detyrat e tij. Asnjë virus nuk mund ta bllokojë demokracinë “-tha David Sasoli, kryetar i Parlamentit Evropian.
Në Itali, prej mbrëmë është shpallur karantinë në nivel shtetëror. Lëvizja është e kufizuar për mbi 60 milion banorë, përveç nëse e kanë të domosdoshme për të shkuar në mjek, ose për shkak të obligimeve të dëshmuara profesionale. Shkollat në Spanjë gjithashtu do të mbyllen në dy javët e ardhshme.
Organizata Botërore e Shëndetit paralajmëron se kërcënimi i një pandemie është shumë i vërtetë, ndërsa në Kinë mbizotëron optimizmi, pasi kanë regjistruar vetëm 19 raste të reja në 24 orët e fundit.