Ministria kineze e Industrisë dhe Teknologjisë së Informacionit ka publikuar një plan pune për zhvillimin e internetit industrial, duke renditur 11 veprime kyçe dhe 54 masa specifike në këtë sektor.
Plani propozon të formulohet dhe zbatohet një version i përmirësuar i projektit “5G+Internet Industrial”, i cili synon të promovojë integrimin, inovacionin dhe zhvillimin e “Internet 5G+Industrial” dhe të përmirësojë platformën e tij të menaxhimit të zhvillimit.
Për sa i përket infrastrukturës, autoritetet kineze do të ndihmojnë rreth 3000 ndërmarrje për të ndërtuar fabrika 5G dhe për të ndërtuar jo më pak se 300 fabrika 5G, duke krijuar 30 standarde pilot, shkruan “CGTN”.
Plani synon gjithashtu të promovojë zhvillimin me cilësi të lartë të rrjeteve të jashtme të “China Telecom”, “China Mobile” dhe “China Unicom” për të lidhur ndërmarrjet dhe burimet e platformës “cloud”, duke shërbyer mbi 3000 ndërmarrje.
Synimi është të përshpejtohet transformimi dhe zhvillimi i rrjeteve të brendshme të ndërmarrjeve në industritë kryesore, të mbështetet ndërtimi i rrjeteve private 5G në ndërmarrjet minerare dhe të përmirësohen rrjetet në zonat industriale kimike.
Deri në fund të prillit, Kina kishte ndërtuar 2.73 milionë stacione bazë 5G, me rrjete 5G që mbulonin të gjitha qytetet në nivel prefekture dhe përdoruesit e telefonave celularë të aktivizuar me 5G arritën në 634 milionë, u bë e ditur në Konferencën Globale të Ekonomisë Dixhitale 2023.
Interneti industrial është integruar plotësisht në 45 sektorë kryesorë brenda ekonomisë kombëtare, me një shkallë industriale prej më shumë se 1.2 trilionë juanë (rreth 166.9 miliardë dollarë).
Kina gjithashtu po avancon në kërkimin dhe zhvillimin e teknologjisë së komunikimit të gjeneratës së gjashtë (6G). (Irma)
