Këshilli i Sigurimit i OKB-së do të mbajë një takim urgjent me kërkesë të Polonisë për të diskutuar shkeljen e hapësirës ajrore polake këtë javë, ka njoftuar ministria e Jashtme polake të enjten.
Njoftimi vjen pas një operacioni të paprecedentë në të cilin Bashkimi Evropian dhe shteti anëtar i NATO-s, Polonia, të mbështetur nga aleatët e NATO-s, rrëzuan të mërkurën dronë të dyshuar rusë që shkelën hapësirën e saj ajrore.
“Ne po tërheqim vëmendjen e botës ndaj këtij sulmi të paprecedentë me dronë rusë ndaj një anëtari të OKB-së, BE-së dhe NATO-s”, ka thënë ministri i Jashtëm, Radoslaw Sikorski për radion lokale.
“Kam dalë para Këshillit të Sigurimit të OKB-së në të kaluarën dhe më duket se argumentet tona kanë qenë bindëse”, ka shtuar ai.
Moska ka mohuar përgjegjësinë për incidentin. Një diplomat i lartë në Poloni ka thënë se dronët kishin ardhur nga drejtimi i Ukrainës, të cilën Rusia e pushtoi në vitin 2022.
Ministria e Mbrojtjes e Rusisë ka thënë se dronët e saj kanë kryer një sulm të madh ndaj objekteve ushtarake në Ukrainën perëndimore dhe se nuk ishte planifikuar goditja e ndonjë objektivi në Poloni.
