Kanadaja do të dërgojë katër tanke Leopard 2 në Ukrainë, njoftoi të enjten ministrja kanadeze e Mbrojtjes Anita Anand.
Sipas saj, kjo do t’u sigurojë ushtarëve një avantazh taktik për shkak të “lëvizshmërisë së tyre të shkëlqyer, fuqisë së zjarrit dhe mbijetesës” dhe se tanket do të lejojnë Ukrainën të rimarrë edhe më shumë nga territori i saj”.
Tanket janë të gatshme për luftim dhe do të dërgohen në Ukrainë gjatë javëve të ardhshme, tha Anand, duke shtuar se një numër anëtarësh të Forcave të Armatosura Kanadeze do t’i trajnojnë ushtarët ukrainas në lidhje me aftësitë që u nevojiten për të operuar pajisjet.
Ajo vuri në dukje gjithashtu se numri i tankeve të premtuara mund të rritet “pasi të koordinojmë planet e dhurimit dhe mbështetjes me aleatët tanë” dhe punojmë së bashku për të grumbulluar municione dhe pjesë këmbimi.
“Tanket nuk janë të lehta për t’u mirëmbajtur, por mbajtja e tyre do të jetë thelbësore për suksesin dhe fitoren e përgjithshme të Ukrainës,” tha ajo, duke treguar kompleksitetin e operacionit të tyre.
Kanadaja do të diskutojë se si të sigurojë “suksesin afatgjatë të donacioneve tona”, me Gjermaninë, Finlandën, Portugalinë, Spanjën dhe Holandën, shtoi ajo.
