Johnson pas takimit me Bidenin: Britania dhe SHBA-ja kanë një ‘marrëdhënie të pashkatërrueshme’

Aleanca midis SHBA-së dhe Mbretërisë së Bashkuar duhet të njihet si “marrëdhënia e pashkatërrueshme”, ka thënë Boris Johnson për BBC-në pasi u takua për herë të parë me presidentin e SHBA-së, Joe Biden.

Ai tha se kishte bisedime “të frytshme” me Bidenin, i cili ka udhëtuar në Cornwall për samitin e G7 të liderëve botërorë.

Samiti fillon më vonë, ku në rend dite janë vaksinat dhe ndryshimet klimatike. Johnson këmbënguli që presidenti amerikan nuk e kishte qortuar atë për tensionet pas Brexit në Irlandën e Veriut. Sidoqoftë, Biden thuhet se ka “shqetësime të thella” mbi situatën.

Të dy burrat u takuan në Carbis Bay, Cornwall të enjten përpara fillimit të samitit G7, i cili do të shohë udhëheqësit e Kanadasë, BE-së, Francës, Gjermanisë, Italisë, Japonisë, SHBA-së dhe Britanisë së Madhe duke u mbledhur personalisht për herë të parë që nga pandemia.

Përpara takimit, Johnson u zotua se Mbretëria e Bashkuar do t’i dhurojë më shumë se 100 milionë vaksina vendeve të varfra gjatë vitit të ardhshëm, ndërsa Biden premtoi gjysmë miliardë doza të vaksinave Pfizer për 92 vende me të ardhura të ulëta dhe të Mesme.

Kombet e G7 pritet të bien dakord kolektivisht për të siguruar një miliard doza të vaksinës COVID-19 në një përpjekje për t’i dhënë fund pandemisë në vitin 2022. /Telegrafi