Ministri i Jashtëm i Iranit, Seyed Abbas Araghchi, deklaroi për televizionin shtetëror se një marrëveshje me Shtetet e Bashkuara për t’i dhënë fund luftimeve është pranë finalizimit dhe përfshin rihapjen e ngushticës së Hormuzit. Ai shtoi se marrëveshja parashikon edhe heqjen e bllokadës amerikane ndaj Iranit, ndërsa bisedimet për programin bërthamor do të zhvillohen në një fazë të mëvonshme.
Zyrtarë amerikanë kanë konfirmuar disa nga detajet, duke theksuar se përfitimet ekonomike për Iranin do të varen nga respektimi i detyrimeve nga ana e Teheranit.
Konflikti nisi më 28 shkurt, pas sulmeve amerikane dhe izraelite në Iran, të cilat nxitën Teheranin të kundërpërgjigjej ndaj Izraelit dhe aleatëve të SHBA-së në Gjirin Persik, si dhe të mbyllte ngushticën e Hormuzit – një nga rrugët kryesore të transportit të naftës dhe gazit natyror të lëngshëm në botë.
Edhe pse në prill u arrit një armëpushim, përplasjet mes dy palëve kanë vazhduar me ndërprerje, përfshirë dy raunde sulmesh këtë javë. Presidenti amerikan Donald Trump deklaroi të enjten se kishte anuluar “sulmet e planifikuara” kundër Iranit, pasi negociatorët kishin arritur “një marrëveshje të madhe”, e cila pritet të nënshkruhet së shpejti.
Të premten, mediat iraniane publikuan disa detaje nga një marrëveshje e supozuar me 14 pika, por Trump e mohoi duke thënë se “nuk ka lidhje me të vërtetën”. Më vonë, kryeministri pakistanez Shehbaz Sharif, vendi i të cilit ka ndihmuar në ndërmjetësimin e bisedimeve, konfirmoi se një Memorandum Mirëkuptimi mes SHBA-së dhe Iranit është arritur dhe pret finalizimin.
Araghchi theksoi se brenda Këshillit të Lartë të Sigurisë Kombëtare të Iranit ka “mbështetës dhe kundërshtarë” të kushteve të marrëveshjes, duke shtuar se ende nuk është marrë një vendim përfundimtar. “Tani për tani, duhet të presim. Nëse miratohet, marrëveshja do të nënshkruhet në distancë,” tha ai.
Izraeli nuk është pjesë e bisedimeve, të cilat synojnë zgjatjen e armëpushimit dhe hapjen e negociatave për çështje kyçe, përfshirë programin bërthamor të Iranit. Prej dekadash, Irani është akuzuar nga vendet perëndimore për përpjekje për ndërtimin e një arme bërthamore, por Teherani ka mohuar duke insistuar se programi i tij ka qëllime paqësore, prodhimin e energjisë elektrike dhe kërkimin shkencor.
/rtsh.al/
