Politikani serb, Nikola Sanduloviç thotë se ngjarjet e fundit në Kosovë që kanë sjellë përçarje në skenën politike janë reflektim i ndikimit të Aleksandër Vuçiqit dhe bashkëpunëtorëve të mbetur nga pushteti i mëparshëm.
Sanduloviç në një intervistë për gazetën “Bota sot”, shprehet se zgjedhjet e reja nuk do të sjellin asgjë të keqe, përkundrazi sipas tij, ato sjellin përgjegjësi më të madhe, pritshmëri më të larta dhe imponojnë qëllime më të larta si në politikë të brendshme ashtu edhe në të jashtme.
“Në çdo zgjedhje të reja në Kosovë tregohet mbështetje gjithnjë e më të madhe e qytetarëve për qeverinë aktuale të z. Albin Kurti dhe sado që ato janë të shpeshta dhe ndonjëherë frustruese për qytetarët, aq më shumë ndërgjegjësimi politik i të gjithë shoqërisë me çdo zgjedhje të re kristalizohet gjithnjë e më shumë dhe bëhet shumë më i qartë në kërkesat dhe qëllimet e tij.
Zgjedhjet e reja nuk sjellin asgjë të keqe, përkundrazi, sjellin përgjegjësi më të madhe, pritshmëri më të larta dhe imponojnë qëllime më të larta si në politikën e brendshme ashtu edhe në atë të jashtme. Nuk ka rrezik për krizë, por vetëm një politikë më të qartë me detyra dhe obligime shumë më të mëdha ndaj qytetarëve. Kjo është ai zjarri në politikën e Albin Kurti që i nevojitet Kosovës në nivelin e brendshëm dhe në raportet me Aleksandër Vuçiq dhe në të njëjtën kohë uji i qetë politik që përfaqëson Vjosa Osmani në skenën ndërkombëtare dhe diplomaci, që i hapin dyert në mbarë botën. Prandaj ata së bashku janë një tandem i pazëvendësueshëm suksesi dhe sigurie jo vetëm për Kosovën, por edhe për të gjithë rajonin”, deklaron Sanduloviç.
Në intervistë politikani serb flet edhe rreth akuzave që i bëhen kryeministrit Albin Kurti si bashkëpunëtor i Serbisë dhe Rusisë, rreth shkrimit të tij për lidhjen e Ramush Haradinajt me Milan Radoiçiqin si dhe për Milaim Zekën që ai e quan “gazetar”.
Për zhvillimet e fundit në Serbi, protestat dhe mos dorëheqjen e Vuçiqit, blerjen e raketave kineze dhe editorialit të përbashkët me Edi Ramën, Sanduloviç jep gjithashtu qëndrimet e tij.
Intervista e plotë:
“Bota sot”: Zoti Sanduloviç, si i keni parë zhvillimet më të fundit politike në Kosovë? Si e komentoni dekretin e presidentes Vjosa Osmani për shpërndarjen e Kuvendit dhe çfarë pritet pas vendimit të Gjykatës Kushtetuese?
Nikola Sanduloviç: Të gjitha ngjarjet e fundit në Kosovë, të cilat po sjellin përçarje në skenën politike, janë reflektim i ndikimit të Aleksandër Vuçiq dhe bashkëpunëtorëve të tij të mbetur nga pushteti i mëparshëm në Kosovë, me të cilët ka bashkëpunuar për vite me radhë, kryesisht mbi baza kriminale. Veprimi i presidentes Vjosa Osmani ka qenë i detyruar pikërisht për shkak të akuzave të rreme ndaj saj dhe ndaj kryeministrit të Kosovës Albin Kurti. Gjykata Kushtetuese tani duhet të marrë, përveç një vendimi ligjor, edhe një vendim politik, në mënyrë që të rivendosë balancën në bashkëpunimin politik mes Presidentes dhe Kryeministrit të Kosovës.
Ndoshta shumëkush ende nuk e ka kuptuar, por bashkëpunimi i tyre është çelësi i zgjidhjes për shumë çështje që i japin Kosovës më shumë siguri, qëndrueshmëri në rrugën drejt BE-së, hyrjen në NATO dhe krijimin e një shteti të vërtetë demokratik në Ballkan. Sado që dikush mund të ketë arritur ose jo të krijojë një përçarje të dukshme apo të përkohshme mes këtyre dy politikave dhe dy liderëve të tillë të spikatur si zonja Vjosa Osmani dhe zoti Albin Kurti, populli i Kosovës duhet ta kuptojë se ka dy “xhevahirë” politikë që e përfaqësojnë vendin e tyre në mënyrën më të mirë.
Është e vërtetë që ata dallojnë në shumë çështje dhe zgjidhje problemesh, si uji dhe zjarri, siç i quaj unë, por mos harroni se zjarri di të digjet edhe në ujë. Tandemi i Kryeministrit Albin Kurti dhe Presidentes së Kosovës Vjosa Osmani sjell rezultate historike për Kosovën dhe rrjedhimisht edhe për Ballkanin. Kjo është e vetmja gjë e rëndësishme dhe ajo që i bën ata të pazëvendësueshëm në funksionet e tyre.
Rezultatet e tyre flasin për vlerat e tyre, ndërsa dallimet mes tyre janë pikërisht përparësia e tyre dhe nuk duhet t’i anashkalojnë në asnjë rrethanë, pavarësisht presioneve, akuzave të rreme dhe lojërave të pista, ndaj të cilave janë të ekspozuar aktualisht së bashku me qytetarët e Kosovës.
Bota sot: Çfarë pret Kosova nga mbajtja e shpeshtë e zgjedhjeve? Sa ekziston rreziku që vendi të rrëshqasë në një krizë të re pas zgjedhjeve të mundshme?
Nikola Sanduloviç: Sipas mendimit tim, në çdo zgjedhje të reja në Kosovë tregohet mbështetje gjithnjë e më të madhe e qytetarëve për qeverinë aktuale të z. Albin Kurti dhe sado që ato janë të shpeshta dhe ndonjëherë frustruese për qytetarët, aq më shumë ndërgjegjësimi politik i të gjithë shoqërisë me çdo zgjedhje të re kristalizohet gjithnjë e më shumë dhe bëhet shumë më i qartë në kërkesat dhe qëllimet e tij.
Zgjedhjet e reja nuk sjellin asgjë të keqe, përkundrazi, sjellin përgjegjësi më të madhe, pritshmëri më të larta dhe imponojnë qëllime më të larta si në politikën e brendshme ashtu edhe në atë të jashtme. Nuk ka rrezik për krizë, por vetëm një politikë më të qartë me detyra dhe obligime shumë më të mëdha ndaj qytetarëve.
Kjo është ai zjarri në politikën e Albin Kurti që i nevojitet Kosovës në nivelin e brendshëm dhe në raportet me Aleksandër Vuçiq dhe në të njëjtën kohë uji i qetë politik që përfaqëson Vjosa Osmani në skenën ndërkombëtare dhe diplomaci, që i hapin dyert në mbarë botën.
Prandaj ata së bashku janë një tandem i pazëvendësueshëm suksesi dhe sigurie jo vetëm për Kosovën, por edhe për të gjithë rajonin.
“Bota sot”: Së fundmi keni publikuar një tekst ku garantoni me jetën tuaj se Albin Kurti nuk bashkëpunon me Serbinë dhe Rusinë. A është klasa politike në Kosovë e ndarë dhe pse ekzistojnë këto deklarata kundër Kurtit?
Nikola Sanduloviç: Çdokush që ka kaluar torturën e regjimit të mëparshëm dhe atij aktual serb, kurrë nuk bëhet bashkëpunëtor i tyre, por bëhet kundërshtar i tyre i përjetshëm. Flas nga përvoja personale dhe nga pozicioni në të cilin jam viktimë e atij regjimi, dhe në të cilin viktimë ka qenë edhe vetë Albin Kurti, si dhe zonja Vjosa Osmani e cila si vajzë e re është detyruar të largohet nga Kosova drejt SHBA-së për të shpëtuar jetën. Si mundet dikush që e ka përjetuar këtë të bashkëpunojë me xhelatin e tij?
A duhet të përmend se Albin Kurti nuk lejoi krijimin e Asociacionit të Komunave Serbe në Kosovë, sepse do të përsëritej e njëjta situatë dhe problem i ardhshëm si Republika Srpska në Bosnje dhe Hercegovinë. Për ata që nuk e dinë, personalisht më ka pyetur z. Albin Kurti çfarë mendoj për këtë dhe i kam thënë hapur se nëse dëshiron një problem të ardhshëm me shkëputjen e komunave të përmendura serbe, të mos pranojë kurrsesi. A pranoi ai pas takimit tonë dhe pas këshillës sime? Natyrisht që jo. Çfarë ju thotë kjo për të dhe në interes të kujt punon ai?
Gënjeshtrat e përhapura për të nga diktatori serb flasin në favor të faktit se Albin Kurti është pengesë dhe jo bashkëpunëtor i Rusisë dhe Serbisë. Kjo gënjeshtër është aq e pabazë sa është bërë edhe qesharake. Fakti që disa e përdorin një gënjeshtër të tillë si argument kundër Kurtit, në mungesë të rezultateve konkrete në politikat që përfaqësojnë, tregon se ekziston një klasë politike dhe ndërmjetës politikë e mercenarë të shërbimeve serbe dhe ruse.
Sulmet e tyre ndaj Albin Kurti dhe Vjosa Osmani janë pikërisht ato që i kanë bërë ata një klasë politike.
“Bota sot”: Ju e keni përmendur disa herë emrin e Milan Radoiçiq dhe keni pretenduar se gjatë qeverisjes së Ramush Haradinaj ai kishte kontroll të madh në veri. Çfarë informacionesh konkrete keni për këto lidhje dhe sa ka ndryshuar realisht situata në veri të Kosovës që kur Kurti është kryeministër?
Nikola Sanduloviç: Sa realisht ka ndryshuar situata në veri të Kosovës me ardhjen e Albin Kurti, e tregon fakti se Milan Radoiçiq tani është person në kërkim nga Interpoli dhe jo bashkëpunëtor i ish-kryeministrit Ramush Haradinaj, i cili krenohej hapur se bashkëpunonte me Milan Radoiçiqin, për të cilin thuhej se vendoste për gjithçka në veri të Kosovës! Imagjinoni deklaratën e një kryeministri të cilitdo vend në botë që thotë hapur se në një pjesë të vendit të tij për gjithçka vendos një kriminel, vrasës, narkotrafikant dhe terrorist?!
Në Serbi, si dhe në Kosovë, dihej se çfarë bënte ai kriminel, vrasës dhe terrorist gjatë kohës kur bashkëpunonte me Haradinajn në veri të Kosovës. Pikërisht ndaj atyre serbëve në Kosovë që ai pretendonte se i përfaqësonte dhe për interesat e të cilëve luftonte. Kërcënime, rrahje, tortura, poshtërime dhe në fund vrasje të përfaqësuesve politikë të serbëve në Kosovë që ishin kundër politikës së Aleksandar Vuçiq, të cilët dëshironin që serbët e Kosovës të integroheshin në realitetin e pashmangshëm, që është shteti i pavarur i Kosovës.
Informacionet konkrete për bashkëpunimin mes Ramush Haradinaj dhe Aleksandar Vuçiq, i cili zhvillohej pikërisht përmes Milan Radoiçiqit, i kam dhënë komunitetit të inteligjencës së SHBA-së dhe së shpejti rezultatet e këtyre bisedave të mia me ta do të marrin edhe epilogun përfundimtar.
“Bota sot”: Ju e akuzoni gazetarin Milaim Zeka se ka përhapur pretendime të pasakta për një plan të Kurtit kundër Richard Grenell. Pse mendoni se është përhapur një narrativë e tillë dhe cili mund të jetë qëllimi përfundimtar i kësaj propagande?
Nikola Sanduloviç: Deklaratat e “gazetarit” të përmendur janë aq të pahijshme dhe mbi të gjitha të pasakta, saqë vënë plotësisht në pikëpyetje profesionin e tij. Richard Grenell ka qenë dhe mbetet një mercenar i zhveshur prej kohësh i Aleksandar Vuçiq, i cili ka shkatërruar plotësisht politikën e Amerikës ndaj Kosovës, dhe rrjedhimisht edhe ndaj të gjithë rajonit.
Sa inteligjent është në qëllimet e tij, nuk do të më çudiste që si motiv të Albin Kurti për likuidimin e Richard Grenellit të kishte përmendur faktin se Aleksandër Vuçiq e ka dekoruar Grenellin me një urdhër të veçantë, vetëm që të dimë edhe shkakun e këtij dekorimi?!
Mendoj se “gazetari” i përmendur i ka marrë 5 minutat e tij të vëmendjes me gënjeshtrat e tij dhe tani duhet lënë në errësirën e tij të parëndësishme… nuk vlen më për vëmendje apo për çfarëdo komenti… gjithçka është e qartë se kush qëndronte pas gënjeshtrave të tij dhe presim vetëm që edhe atij Aleksandër Vuçiq t’i dorëzojë të njëjtin dekorim si Richard Grenell.
“Bota sot”: Ndër të tjera, në tekstin tuaj theksoni se këto akuza vijnë nga “kuzhina” e pushtetit në Serbi. A mendoni se mediat dhe disa figura publike në rajon përdoren për luftë politike dhe propagandë?
Nikola Sanduloviç: Natyrisht që përdoren të gjitha mediat e mundshme dhe individët për të shpërndarë politikën e qeverisë aktuale në Kosovë dhe për të rrënuar reputacionin e Presidentes së saj. Kujtoni vetëm artikujt e tmerrshëm dhe mysafirët jo të mençur në mediat serbe, të cilët talleshin me aktivitetet e udhëheqësve tuaj më të lartë dhe aktivitetet e tyre diplomatike në botë, veçanërisht sukseset në SHBA dhe MB.
Pse ju habit që Aleksandër Vuçiq pas kësaj ka nisur të gjithë fushatën e tij të pisët mediatike nga Serbia dhe e ka zhvendosur në terrenin e Kosovës dhe tek bashkëpunëtorët e vjetër të shërbimit serb? Kjo është dëshmi se nuk ka ndikim personal mbi pushtetin tuaj dhe kjo e bën aq të pamend, sa bën gabime të tilla me “gazetarin” e përmendur, duke zbuluar qëllimet e tij dhe të gjithë “gjumashët” e tij.
“Bota sot”: Le të ndalemi pak te situata politike në Serbi. Pse protestat kundër Aleksandër Vuçiq nuk kanë çuar në dorëheqjen e tij dhe sa e rrezikuar është demokracia e një vendi kur pas protestave masive nuk ndodh dorëheqja?
Nikola Sanduloviç: Në fillim të protestave, unë i pari, si dhe e gjithë Partia Republikane, së bashku me ekipin tim nga SHBA, dhamë mbështetje të pakushtëzuar për studentët dhe protestat e tyre. Në të njëjtën kohë i paralajmërova publikisht se do të ishin të ekspozuar ndaj metodave të vjetra dhe të provuara të UDB-së për të shkatërruar unitetin e tyre. Në rininë time, me mburrje dhe mungesë përvoje, ata nuk më dëgjuan dhe shpejt ato protesta u kthyen në një turmë ku u prishën flamujt e BE-së, u mbajtën flamuj dhe simbole ruse, dhe brohoriteshin parulla: “Kosova është zemra e Serbisë”.
Menjëherë pas kësaj, unë, së bashku me të gjithë Partinë Republikane dhe bashkëpunëtorët e mi nga SHBA, ndaluam t’u japim mbështetje dhe publikisht u distancuam nga të gjitha veprimet dhe kërkesat e tyre. Ata dhe protesta të tilla tani janë nën kontroll të plotë të BIA-s dhe vetë Aleksandar Vuçiq. Me protesta të tilla, pa një qëllim konkret dhe të vërtetë, me një kërkesë të vetme, nuk ka dorëheqje të regjimit aktual, por përforcim të pozicionit të tij përmes daljes në zgjedhje nën të njëjtat kushte që ky pushtet ka vendosur dekada me radhë, ku është vjedhur, kërcënuar dhe ryshfeti është dhënë hapur për të marrë pushtetin në “zgjedhje” të tilla.
Unë nuk do të marr pjesë në këtë dhe me pjesëmarrjen time në këto zgjedhje do t’i jepja legjitimitet të plotë krimit dhe vjedhjes. Në Serbi NUK ka mbretëruar kurrë demokracia dhe kjo shoqëri ende nuk ka përjetuar asnjë moment se si demokracia e vërtetë ndikon në jetën e saj të përditshme. Aluzion, iluzion, paradoks dhe parodi në të njëjtën kohë – KJO ËSHTË REALITETI dhe PAMJA E VËRTETË E SERBISË SË SOTME.
“Bota sot”: Ju e quani hapur Aleksandër Vuçiq “kriminel lufte” dhe e akuzoni për përpjekje për diskreditimin e liderëve të Kosovës. Cili është, sipas jush, qëllimi politik i tij aktual ndaj Kosovës?
Nikola Sanduloviç: Kush në Kroaci mbajti fjalime nxitëse dhe i nxiti serbët atje të ndërmerrnin një kryengritje të armatosur në Kroaci dhe të shkëputnin një pjesë të territorit të saj? Kush ishte pjesëmarrës në Safarin e Sarajevës kundër civilëve dhe fëmijëve në Bosnjë dhe Hercegovinë? Kush në Parlamentin serb kërkoi vrasjen e 100 myslimanëve për një serb? Kush ishte Ministri i Informacionit i Millosheviqit që fshehu nga publiku serb krimet e tmerrshme në Kosovë të kryera kundër civilëve dhe fëmijëve shqiptarë? Kush urdhëroi terroristin Milan Radoiçiq të shkonte në Kosovë, për të shkaktuar një luftë të re midis shqiptarëve dhe serbëve me qëllim ndarjen e një pjese të Kosovës? Kush i drejtoi përleshjet midis serbëve dhe policëve dhe anëtarëve të KFOR-it shqiptarë në barrikada dhe ura? Kush urdhëroi vrasjen time sepse vura lule në varrin e vajzës shtatëvjeçare shqiptare të vrarë Blerina Jashari dhe sepse kërkova falje për krimet e tij, të Millosheviqit dhe Sheshelit në Kosovë? Kush vazhdon të thotë se Kosova është një pjesë e patjetërsueshme e Serbisë dhe se askush dhe asgjë nuk do ta detyrojë ta pranojë këtë? ALEKSANDAR VUÇIC! Pas këtyre fakteve që kam paraqitur, vetëm një pjesë të vogël, përfundoj se çfarë qëllimi politik ka Aleksandar Vuçiq ndaj Kosovës.
“Bota sot”: Serbia ka blerë sistemin raketor kinez FK-3 Air Defense System. A mendoni se ky armatim është vetëm për mbrojtje apo përfaqëson një sinjal force ndaj Kosovës dhe rajonit të Ballkanit?
Nikola Sanduloviç: Është e papranueshme që NATO ende nuk ka dhënë përgjigjen e saj të fortë ndaj lëvizjeve kaq drastike dhe të dukshme të diktatorit serb. Vizioni i tij për armatosjen e Serbisë është versioni përfundimtar i asaj ideje të njohur vetëm për të, dhe përfaqëson jo vetëm një rrezik të mundshëm për Kosovën, por edhe për Bosnjën dhe Hercegovinën, Malin e Zi dhe Kroacinë. Nëse nisemi nga fakti se Aleksandar Vuçiq i shënjestroi dhe i shënoi paraprakisht Kosovën, Kroacinë dhe Shqipërinë si agresorë të ardhshëm në Serbi, dhe krejtësisht pa asnjë arsye, atëherë SHBA-të dhe NATO duhet të kryejnë një analizë të mirë dhe të detajuar në lidhje me veprimet dhe deklaratat e tij dhe të marrin vendime të caktuara të sigurisë dhe politike sipas rreziqeve të mundshme të armatimit megaloman të Vuçiqit.
“Bota sot”: Duke pasur parasysh tensionet e vazhdueshme mes Kosovës dhe Serbisë, a mund të interpretohet kjo blerje armësh nga qeveria e Aleksandër Vuçiq si përpjekje për presion ushtarak ndaj Kosovës?
Nikola Sanduloviç: Kjo armatosje mund të interpretohet në mënyra të ndryshme. Për shkak të pasurimit personal përmes korrupsionit dhe çmimeve të rreme të dakordësuara, sepse ai është jashtë kontrollit se ku dhe si i shpenzon paratë e taksapaguesve të Serbisë, lëshimeve ndaj aleatëve të tij Kinës dhe Rusisë, presionit ndaj BE-së dhe shantazhit nga ana e tij në lidhje me destabilizimin e mundshëm të Rajonit, gjë që nuk i përshtatet aspak Evropës në konfliktin e ardhshëm me Rusinë, por edhe sigurisht si një shfaqje fuqie dhe frikësimi të të gjitha vendeve në Rajon, shumica e të cilave janë anëtare të NATO-s. Kjo mund të interpretohet si një provokim drejtuar NATO-s dhe BE-së duke u treguar atyre bashkëpunimin e tyre të hapur ushtarak dhe teknologjik me Rusinë dhe Kinën, gjë që është më se e qartë.
“Bota sot”: Nëse Serbia vazhdon këtë politikë të armatosjes, a duhet që NATO dhe partnerët perëndimorë të rrisin praninë e tyre të sigurisë në Kosovë?
Nikola Sanduloviç: NATO është tashmë vonë në vendimet dhe vendosjen e ushtarëve shtesë dhe armëve të reja specifike në Kosovë, por edhe në Bosnjë dhe Hercegovinë. Në çfarë lloj rrethanash dhe sfidash të përditshme ndodhet Evropa dhe duke ditur natyrën problematike dhe të paqëndrueshme psikologjike të diktatorit nacionalist të Serbisë, çdo prani parandaluese dhe shtesë, si dhe aktiviteti i NATO-s në këtë rajon është i mirëpritur dhe më se i nevojshëm sepse do të ishte një faktor pengues për aspiratat e luftës së diktatorit të çmendur. I gjithë komuniteti ndërkombëtar, si dhe SHBA-të, Mbretëria e Bashkuar dhe BE-ja, duhet të jenë të vetëdijshëm për faktin se çdo konflikt në Rajon vetëm sa do ta zgjaste dhe forconte sundimin kriminal të Aleksandar Vuçiqit në Serbi. Mendoj se kjo është karta e tij e fundit e fortë, të cilën ai do ta përdorte me mjeshtëri për të zgjatur mbijetesën e tij në pushtet dhe liri. Ai erdhi në pushtet në krahët e konflikteve provokuese afatgjata në Rajon, duke krijuar urrejtje dhe luftëra, dhe me retorikën e tij të pasinqertë dhe politikën e tij tinëzare ndaj BE-së dhe SHBA-së, ai vazhdimisht e ruajti atë atmosferë për atë moment të konfliktit të ardhshëm që do ta shihte si rrugëdalje nga rënia e tij.
“Bota sot”: Për fund, është raportuar për një editorial të përbashkët të kryeministrit shqiptar Edi Rama dhe presidentit Aleksandar Vuçiq, ku kërkohet që Shqipëria dhe Serbia të pranohen në BE pa të drejtë vetoje. Si e shihni këtë mbështetje të Ramës për Serbinë dhe a mund të konsiderohet si “tradhti” ndaj Kosovës?
Nikola Sanduloviç: Edi Rama është larg të qenit politikani im i preferuar dhe e konsideroj atë një bashkëpunëtor shumë të ngushtë të Aleksandar Vuçiqit për shumë çështje, gjë që e diskrediton shumë atë si politikan dhe si njeri.. Nuk do ta ngatërroj publikun, por do të jem i lirë të shkruaj se së shpejti do të dalin shumë gjëra që lidhen me punët e tij.. por le të jenë miqtë e mi nga FBI ata që do ta shpallin sepse ata kanë punuar për këtë për shumë vite dhe duhet ta marrin atë njohje. Shpresoj që politika e tij ndaj autoriteteve në Kosovë të jetë e sinqertë dhe me qëllime të mira, por nëse do të isha unë, do të isha pak më i kujdesshëm dhe i përmbajtur në marrëveshjet me të dhe premtimet e tij.. Mund të shkruaj lirisht, sipas informacioneve nga qarqet politike në të cilat lëviz, se Edi Rama dhe Aleksandar Vuçiq janë tashmë në të kaluarën politike, por askush nga zyrtarët nuk i ka informuar ende…
