Fund i një epoke në hapësirë – demolohet platforma e raketave evropiane-ruse.
Në portin hapësinor të Kourou-s në Guajanën Franceze, është shënuar fundi simbolik i një bashkëpunimi historik mes Evropës dhe Rusisë në fushën e hapësirës.
Platforma e lëshimit e përdorur për raketat ruse Soyuz është demoluar plotësisht, duke i dhënë fund një periudhe 15-vjeçare të operacioneve të përbashkëta, shkruan themoscowtimes.
Ky vend ishte një nga pikat kyçe të bashkëpunimit hapësinor euro-rus, ku për më shumë se një dekadë u realizuan lëshime të shumta satelitësh për misione civile dhe shkencore.
Bashkëpunimi mes Rusisë dhe Agjencisë Hapësinore Evropiane u ndërpre në vitin 2022, pas pushtimit rus të Ukrainës, duke shënuar një kthesë të madhe në marrëdhëniet ndërkombëtare në sektorin e hapësirës.
Që nga ajo kohë, infrastruktura e Soyuz-it në Kourou ka qenë gradualisht duke u çmontuar, ndërsa tani me shembjen e plotë të platformës, mbyllet përfundimisht një kapitull i rëndësishëm i eksplorimit hapësinor të përbashkët mes dy palëve.
