Policia kombëtare e Spanjës arrestoi të enjten kreun e dyshuar të një prej degëve të Camorra-s — një organizatë e fuqishme kriminale italiane me seli në Napoli — në qytetin e Gironas në rajonin verior të Katalonjës.
Burri, emri i të cilit nuk është bërë i ditur, ishte subjekt i tre urdhër-arresteve evropiane për anëtarësim në një organizatë kriminale dhe trafik droge “në shkallë të gjerë”, shkruajnë mediat e huaja.
Burri i arrestuar thuhet se është kreu i klanit Orlando-Polverino-Nuvoletta, i cili ka lidhje me organizatën kriminale Camorra dhe që vepron kryesisht në rajonin jugor italian të Marano-s.
Hetimi në Spanjë daton që nga shkurti, kur autoritetet mësuan se i akuzuari, i cili kishte qenë në arrati që nga gushti i vitit 2024, mund të ishte në Spanjë “duke kryer aktivitetet e tij në lidhje me trafikimin e substancave narkotike”, thuhet në një deklaratë të policisë.
Sipas policisë, “i arratisuri” përdori mjete të ndryshme për të shmangur gjetjen nga forcat e rendit, duke përfshirë “përdorimin e pajisjeve të ndryshme celulare me linja telefonike në Lituani dhe Mbretërinë e Bashkuar (dhe) dokumentacion të rremë për të dhe partneren e tij”.
I dyshuari gjithashtu mori me qira shtëpi pushimi në pjesë të ndryshme të Barcelonës dhe Gironas, “ku kaloi vetëm disa ditë dhe më pas ndryshoi menjëherë vendbanimin”.
Hetimi zbuloi se burri kishte ndërtuar një “rrjet kontaktesh” në Barcelonë, ku familja dhe miqtë “ishin përgjegjës për mirëmbajtjen e logjistikës së transportit dhe shpërndarjes së drogës, si dhe automjeteve dhe shtëpive”.
Autoritetet vendosën një sërë pajisjesh mbikëqyrjeje, me “linja hetimi të përqendruara kryesisht në mjedisin e ngushtë të të arratisurit”.
Agjentët mbikëqyrën një nga shtëpitë ku ai fshihej dikur në një zonë banimi në Girona, duke i çuar përfundimisht ata në identifikimin e të arratisurit ndërsa ai po largohej nga prona me një makinë.
Në vitin 2018, policia spanjolle arrestoi Antonio Orlandon, një nga krerët e bandës kriminale të përbërë nga tre klanet më të fuqishme në Napoli, i cili kishte arritur t’i shpëtonte drejtësisë për 15 vjet, pavarësisht se konsiderohej një nga kriminelët më të rrezikshëm në Itali.
