Presidenti turk Rexhep Erdogan hodhi poshtë të dielën zërat për zgjedhje të parakohshme, duke përsëritur se ato do të mbahen në mesin e vitit 2023 siç është planifikuar, raporton Anadolu.
“Nuk do të ketë zgjedhje këtë nëntor”, tha Erdogan, duke shtuar se në vend të kësaj ato do të mbahen siç ishte planifikuar “në qershor të vitit të ardhshëm”.
Në Turqi, zgjedhjet do të mbahen në qershor 2023, në të cilat votuesit do të zgjedhin presidentin, si dhe 600 anëtarët e parlamentit të shtetit.
Presidenti dhe deputetët në Turqi zgjidhen për një mandat pesëvjeçar, ndërsa presidenti ka autorizimin të shpallë zgjedhje të parakohshme.
Erdogan edhe më herët ka thënë se zgjedhjet do të mbahen në vitin 2023, si dhe ka konfirmuar kandidimin e tij për një mandat tjetër presidencial.
