Në Sanxhak po vërehet gjithnjë e më qartë një forcim i ndjenjës së identitetit kombëtar tek të rinjtë, të frymëzuar nga trashëgimia familjare dhe historia e gjyshërve të tyre. Ky fenomen po reflektohet hapur edhe në rrjetet sociale, ku të rinjtë pa hezitim shprehin përkatësinë dhe krenarinë e tyre etnike, shkruan profili në facebook Kosova për Sanxhakun.
Një nga shembujt më të komentuar së fundmi është ai i Elma Xhankoviq nga Pazari i Ri, me prejardhje nga vendbanimi Koniçë në Tutin. Për muaj të tërë, ajo ka publikuar fotografi dhe përmbajtje me gjyshin e saj nga ana e nënës, Haxho Hamidoviq, duke vënë në pah lidhjen e fortë familjare dhe identitare.
“Në Sanxhak, për çdo ditë e më tepër, të rinjtë frymëzuar nga gjyshërit e tyre me krenari shprehin ndjenjat e tyre kombëtare. Kështu ka muaj të tërë në rrjetet sociale Elma Xhankoviq, nga Pazari i Ri, me prejardhje nga vendbanimi Koniçë, Tutin, nga i cili vendbanim, por edhe tre të tjerë janë të fisit Shalë, ka publikuar fotografi me gjyshin e sajë nga e ëma Haxho Hamidoviq. Përveç që ka publikuar , ku qartë shihet veshja tipike shqiptare duke ekzekutuar në lahutë, Elma vë theksit me simbolet kombëtare shqiptare te përkatësia e sajë nacionale”, shkruan në faqen e facebookut Kosova për Sanxhakun.
Në fotografitë e shpërndara, gjyshi i Elmas shihet i veshur me kostum tradicional shqiptar, duke ekzekutuar lahutën – instrument simbol i trashëgimisë kulturore shqiptare.
Sipas burimeve lokale, Koniça, por edhe disa vendbanime të tjera në zonë, janë të njohura për prejardhjen nga fisi Shalë, një element që përforcon edhe më tej narrativën e ruajtjes së identitetit shqiptar në Sanxhak. (INA)
