Dronë me rreze të gjatë veprimi të ushtrisë ukrainase kanë sulmuar një fabrikë industriale rreth 1.300 kilometra brenda territorit rus, njoftuan të martën autoritetet lokale ruse.
Guvernatori i rajonit Bashkortostan, Radiy Habirov, tha se dy dronë kishin shënjestruar një objekt industrial në qytetin Sterlitamak, por u rrëzuan nga mbrojtja ajrore. Ai shtoi se nuk pati viktima dhe se fabrika vazhdon punën normalisht.
Megjithatë, administrata lokale raportoi një shpërthim në uzinën petrokimike të Sterlitamakut, që shkaktoi shembjen e pjesshme të impiantit të trajtimit të ujërave. Shkaku i shpërthimit mbetet i paqartë. Fabrika prodhon gomë dhe karburant për aviacion dhe nuk është goditur më parë.
Sulmet e guximshme të Ukrainës thellë brenda territorit rus kanë vënë në siklet Moskën dhe kanë shqetësuar qytetarët rusë, ndërsa Kievi synon të godasë rafineritë e naftës, fabrikat ushtarake dhe qendrat logjistike për të dobësuar fushatën e Kremlinit pothuajse katër vjet pas pushtimit të Ukrainës.
Në të njëjtën kohë, në rajonin rus Nizhny Novgorod, mediat raportuan shpërthime pranë një rafinerie dhe fabrike petrokimike, rreth 800 kilometra nga kufiri me Ukrainën, megjithëse autoritetet nuk i kanë konfirmuar zyrtarisht.
Ministria ruse e Mbrojtjes njoftoi se gjatë natës janë rrëzuar 85 dronë ukrainas në disa rajone, përfshirë Bashkortostanin dhe Nizhny Novgorodin.
Nga ana tjetër, autoritetet ukrainase raportuan se Rusia ka bombarduar rajonin e Dnipropetrovskit gjatë natës me dronë, raketa dhe artileri, duke vrarë një person dhe plagosur 11 të tjerë, mes tyre dy fëmijë.
