Edhe pse temperaturat jashtë ende ngjajnë me verën, për qytetarët maqedonas dimri ka nisur tashmë – të paktën kur bëhet fjalë për zbrazjen e buxhetit familjar.
Gara tradicionale për sigurimin e druve dhe peletit këtë vit po shndërrohet në një makth financiar, me çmime që vazhdojnë të rriten.
Sipas të dhënave të fundit nga tregu, drutë për ngrohje në depot private kanë arritur nga 4.750 deri në 5.000 denarë për metër kub. Ndërkohë, “Pyjet Kombëtare” ofrojnë çmime më të ulëta, rreth 3.192 denarë për dru lisi dhe 3.092 denarë për ah.
Por realiteti në terren është krejt tjetër. Qytetarët e dinë se sa e vështirë është të sigurohen në kohë drutë nga shteti, ndaj shumë familje detyrohen t’i blejnë ato te shitësit privatë me këto çmime të larta.
Nëse kësaj i shtohen edhe shpenzimet për transport, rreth 400 denarë për metër kub, si dhe prerja dhe copëtimi, një familje mesatare që ka nevojë për gjashtë metra kub duhet të shpenzojë një shumë të konsiderueshme vetëm për të mos u përballur me të ftohtin gjatë dimrit.
Diferenca mes furnizimit më të lirë dhe atij më të shtrenjtë tashmë kalon 10.000 denarë për familje.
Peleti? Nga alternativë ekonomike në luks
Situata nuk është aspak më e mirë as me peletin. Ky burim energjie, që dikur promovohej si alternativë ekologjike dhe e leverdishme, tani po shndërrohet në një luks të paarritshëm për shumë familje.
Çmimi për një ton pelet aktualisht varion nga 14.500 deri në 22.000 denarë, në varësi të cilësisë.
Për familjet që gjatë sezonit të ngrohjes konsumojnë nga katër deri në gjashtë tonë, kjo nënkupton një goditje të rëndë për buxhetin familjar, e cila mund të arrijë mbi 130.000 denarë.
Paniku te qytetarët është i dukshëm. Tregtarët pranojnë se një pjesë e rezervave të peletit janë shitur që në muajin gusht, ndërsa qytetarët, nga frika e rritjeve të reja të çmimeve dhe mungesës së furnizimit, po përpiqen t’i sigurojnë sasitë e nevojshme paraprakisht.
Në këto kushte, shumë familje mbeten të vetme përballë kostos së lartë të ngrohjes. Kalendari ende tregon verë, por dimri duket se ka mbërritur tashmë – në kuletat e qytetarëve.
