Zëvendëskryeministri i Qeverisë së Republikës së Maqedonisë së Veriut, përgjegjës për çështje ekonomike, koordinim me resorët ekonomikë dhe investimet, Fatmir Bytyqi, mbajti fjalim në manifestimin e organizuar nga Operatori Kombëtar i Tregut të Energjisë Elektrike – MEMO, me rastin e fillimit të punës në tregun e organizuar të Maqedonisë të energjisë elektrike, tregu një ditë përpara.
Në fjalimin e tij, zëvendëskryeministri Bytyqi tha se fillimi i funksionimit të tregut të organizuar të energjisë elektrike në Maqedoni është një moment historik për vendin tonë, për energjinë tonë dhe për ekonominë tonë, sepse me këtë vendi ynë i bashkohet një tregu evropian shumë konkurrues dhe dinamik të energjisë elektrike, që do të na mundësojë më tej të lidhim tregun vendor të energjisë elektrike me tregjet fqinje dhe të përmbushim nevojat tona për energji në mënyrën më efikase.
“Bursa e energjisë elektrike do të mundësojë një treg konkurrues në të cilin energjia elektrike do të tregtohet në mënyrë transparente, jodiskriminuese dhe efikase, pra shkëmbim i ofertës dhe kërkesës për energji elektrike në vend”. Me blerjen dhe shitjen aktive të energjisë elektrike në treg një ditë përpara, më në fund do të arrihet një çmim referencë i energjisë elektrike në tregun me shumicë në Maqedoninë e Veriut. Kjo bursë, e cila do të menaxhohet nga Operatori Kombëtar i Tregut të Energjisë Elektrike MEMO, do të mundësojë transparencë, konkurrencë dhe efikasitet më të madh në tregtimin e energjisë elektrike në tregun me shumicë. Gjithashtu, të gjitha kompanitë tona dhe investitorët tanë kanë mundësinë për tregti transparente dhe jodiskriminuese të energjisë elektrike”, tha Bytyqi.
Zëvendëskryeministri Bytyqi theksoi se tregu i Maqedonisë i energjisë elektrike nuk është i rëndësishëm vetëm për vendin tonë, por edhe për gjithë rajonin, sepse mbyll një cikël madhor të liberalizimit të tregut të energjisë elektrike, sipas modelit PAN evropian të tregjeve të energjisë elektrike.
“Shpresoj se Maqedonia e Veriut do të përdorë pozicionin e saj gjeografik dhe lidhjen e mirë të ndërlidhjes me fqinjët e saj për një lidhje rajonale me tregjet e energjisë elektrike nga BE-ja dhe rajoni i Ballkanit Perëndimor sa më shpejt që të jetë e mundur, gjë që do të sjellë likuiditet në tregun e energjisë elektrike, flukse më të mëdha të energjisë elektrike dhe çmim konkurrues të energjisë elektrike në tregun e liberalizuar. Megjithatë, më duhet të theksoj se hapja e bursës së energjisë elektrike nuk është qëllimi përfundimtar. Është vetëm një nga hapat e shumtë që po hedhim në krijimin e një tregu modern të energjisë në vendin tonë”, tha Bytyqi dhe nënvizoi se kjo hap shumë mundësi të reja për zhvillimin dhe prosperitetin e vendit tonë dhe tërheqjen e investitorëve të rinj në objektet e prodhimit nga burimet e rinovueshme të energjisë si dielli, era etj.
“E gjithë kjo kontribuon në krijimin e kushteve edhe më të mira për investitorët e huaj potencialë në Maqedoninë e Veriut në fushën e prodhimit të energjisë elektrike nga burimet e rinovueshme të energjisë, si dhe stabilitet më të madh të sistemit energjetik në vend. Gjithashtu, tregtimi në treg një ditë përpara do të mundësojë optimizimin e portofoleve mes prodhuesve dhe përshtatjen më të lehtë të punës me kapacitetet e mëdha konsumatore të energjisë elektrike”, tha Bytyqi.
