Njerëz anembanë Evropës protestuan kundër presidentit amerikan Donald Trump dhe këshilltarit të tij Elon Musk sot, pas një jave të trazuar në tregjet financiare shkaku i tarifave gjithëpërfshirëse globale të Trumpit.
Në Frankfurt të Gjermanisë, grupi Democrats Abroad, organizata zyrtare e Partisë Demokratike për qytetarët amerikanë që jetojnë jashtë, organizoi protestat “Hands Off”.
Në Berlin, jashtë një dyqani Tesla, protestuesit mbanin pankarta që u bënin thirrje amerikanëve që jetojnë në Gjermani të protestojnë për t’i dhënë fund kaosit.
Bëhet e ditur se në një tubim në Opernplatz të Frankfurtit, protestuesit kërkuan dorëheqjen e presidentit amerikan, duke mbajtur pankarta ku shkruhej “Rivendosni demokracinë”, “Larg duart nga të dhënat tona personale” dhe “Bota është e lodhur nga marrëzitë tuaja Donald, largohu”.
Në Berlin, shiheshin parulla drejtuar Musk si “Mbylle Elon, askush nuk votoi për ty”.
Protestuesit në Paris, kryesisht amerikanë, u mblodhën në Place de la Republique kundër Trumpit.
Disa mbajtën fjalime për të denoncuar presidentin, duke valëvitur pankarta ku shkruhej “Rezistoni tiranit”, “Sundimi i ligjit”, “Feministët për lirinë, jo për fashizmin” dhe “Shpëtoni demokracinë”.
Ndryshe, protestat kundër Trump dhe Musk u mbajtën edhe në qytete të tjera evropiane, duke përfshirë Londrën dhe Lisbonën.
