Zëvendëskryeministri i Kosovës, Besnik Bislimi, ka thënë se gjykatat në Kosovë nuk kanë ndikim nga Qeveria.
Ai ka theksuar se bashkësia ndërkombëtare duhet të jetë e njëjtë me kërkesat e saja kur thotë se Kushtetuta e Kosovës duhet të zbatohet.
“Pyetjet që duhet ta shtroni janë : Sa janë të pavarura gjykatat tona? Është shumë e qartë që gjykatat janë të pavarura nga Qeveria, por a janë të pavarura? Nëse jo, pyetja që duhet të shtroni është se nga kush varen gjykatat tona? Nëse unë kritikoj një vendim, unë bash se kritikoj se ai vendim nuk është i pavarur. Sepse do të doja që gjykatësi të vendosë në bazë të elementeve pa ndërhyrje nga jashtë, qoftë kjo brenda Kosovës, qoftë jashtë Kosovës”.
“Kushtetuta e Kosovës ose duhet të zbatohet në tërësi ose të mos zbatohet. Nuk ka logjik që në njërin rast të ketë insistim të bashkësisë ndërkombëtare që Kushtetuta të implementohet në tërësi, siç është rasti i tokës për Manastirin e Deçanit dhe nenin 11 që thotë ka vetëm një monedhë në qarkullim në Kosovë. Të njëjtit miq të thonë këtë mos e zbatoni. Kushtetuta ose është e shenjtë dhe duhet të zbatohet, ose pastaj bëjmë ‘pick a cherry’. Nëse duhet bërë ‘pick a cherry’ e bëjmë ne, por nëse zbatohet, insistoni që të zbatohet në të gjitha rastet”, pohoi Bislimi në një konferencë për media me ministrin e Çekisë për Çështje Evropiane, Martin Dvorak.
Kjo deklaratë e Bislimit vjen pasi ambasadori gjerman në Kosovë, Jorn Rohde, ka thënë se Kosova duhet ta zbatojë vendimin e Gjykatës Kushtetuese për Manastirin e Deçanit.
Rohde tha se sundimi i ligjit “à la carte” (të zgjedhësh gjërat sipas dëshirës, jo sipas një parimi më të madh) nuk e hap rrugën e Kosovës drejt anëtarësimit të Kosovës në Këshillin e Evropës e as drejt Bashkimit Evropian.
“Mbështetja për Kosovën në rrugën e saj të integrimit evropian është për zemër, por edhe Kosova duhet ta bëjë pjesën e saj”, ka shkruar Rohde, transmeton Klankosova.tv.
Ndërsa, shefi i Zyrës së BE-së në Kosovë, Tomas Szunyog, gjatë vizitës që i ka bërë dje Gjykatës Kushtetuese ka kërkuar që vendimet e saj të zbatohen plotësisht.
“Vendimet e Gjykatës Kushtetuese të respektohen dhe zbatohen plotësisht, përfshirë edhe aktgjykimin e datës 19 maj 2016 për çështjen e Manastirit të Deçanit”, është shprehur Szunyog.
