Pandemia, solli krizën më të madhe ekonomike që ka ndodhur që nga Depresioni i Madh e këndej, parashikueshmëria është e vështirë, por projeksioni afatmesëm është i nevojshëm dhe vendimtar për përcaktimin e modelit të rritjes më të shpejtë ekonomike bazuar në inovacion, kapitalin njerëzor dhe digjitalizimin, theksoi ministri i Financave Fatmir Besimi, në takimin përmbyllës në kuadër të misionit të rregullt të Fondit Monetar Ndërkombëtar.
Nga Ministria e Financave njoftuan se në takimin përfundimtar u prezantuan pikëpamjet përfundimtare në lidhje me projeksionet makroekonomike dhe fiskale për periudhën e ardhshme.
Ministri i Financave u shpreh i vendosur se politikat dhe masat e ndërmarra dhe të planifikuara do të përshpejtojnë rritjen ekonomike në periudhën e ardhshme pesë vjeçare dhe do të rrisin potencialin e rritjes së ekonomisë së brendshme përmes investimeve në infrastrukturë, energjetikë, mjedis jetësor si dhe në drejtim të kapitalit njerëzor dhe digjitalizimit.
“Politikat që do të mbështesin kërkesën e brendshme, investimet, konkurrencën dhe aktivitetin e eksportit do të vazhdojnë në vitin 2021 me qëllim të rimëkëmbjes më të shpejt të ekonomisë së brendshme dhe krijimit të bazës për rritje të përshpejtuar ekonomike në periudhë afatgjate. Konsolidimi i planifikuar fiskal, ridizajnimi i politikës së buxhetit dhe Strategjia për rimëkëmbjen ekonomike dhe rritjen e përshpejtuar (SmartER Growth) janë një bazë e fortë për përshpejtimin e rritjes ekonomike në periudhën e ardhshme”, potencoi ministri Besimi.
Ai potencoi se sipas projeksioneve indikative, rritja ekonomike në vitin 2025 pritet të arrijë 5,9 për qind, ndërsa në periudhën prej vitit 2026 deri në vitin 2030 parashihet stabilizim i shkallës mesatare të rritjes ekonomike në 5,75 për qind në vit.
