Kryetari i Partisë Demokratike (PD) në Shqipëri, Sali Berisha, ka deklaruar se kryeministri shqiptar, Edi Rama, ka anuluar mbledhjen e përbashkët me Qeverinë e Kosovës me urdhër të presidentit serb, Aleksandar Vuçiq.
Në një reagim në Facebook, Berisha ka shkruar se ky anulim nga Rama u bë si “hakmarrje” ndaj refuzimit të draft-statutit të tij për Asociacionin nga autoritetet në Kosovë, duke përmendur këtu edhe dyshimet për korrupsion të Ramës me ish-agjentin e FBI, McGonigal.
“Ky vendim për anulimin e mbledhjes si hakmarrje për hedhjen poshtë nga qeveria dhe forcat politike të Kosovës të draftit të tij të marrë në sirtaret e Beogradit, dëshmon së çfarë është i gatshëm të bëjë ky njeri për serbomadhin Vuçiç, por dhe lëkurën e tij, pasi është në hetim penal për aferën McGonigal, korruptimin e ish shefit të kundërinteligjencës së Neë York-ut në kohën kur ai ishte në detyrë. Shtoj këtu se, javë më parë dosja shqiptare e McGonigal me personazhë kryesorë Ramën dhe bashkëpuntorët e tij u bashkua për shkak të lidhjeve me dosjen ruse”, ka shkruar Berisha.
Tutje, ai ka dënuar ndërhyrjen e Ramës në “punët e brendshme të Kosovës”.
“Dënoj me ashpërsinë më të madhe aktin e ndërhyrjes brutale të Edi Ramës në punët e brendshme të Kosovës dhe i bëjë thirrje komunitetit ndërkombëtar të mos harrojë se Edi Rama në këtë sherr më qeverinë e Kosovës mbron interesa personale dhe se, që nga ardhja e tij në pushtet ai është protagonist kryesor i projekteve të Serbisë së Madhe dhe ndarjes së Kosovës me Aleksandër Vuçiç”, ka shkruar ai.
Kreu i PD-së në fund i ka bërë thirrje Kosovës që të bëjë ç’është e mundur për qetësimin e situatës në veri dhe zbatimin e marrëveshjes së 18 marsit të arritur në Ohër.
