Bashkim Bakiu nuk do të dorëzohet nesër si propozim për ministër të ri të Shëndetësisë, njofton një funksionar i lartë qeveritar për TV24 transmeton Zhurnal.mk
Sipas të njëjtit funksionar, propozimi i kryeministrit Hristijan Mickoski do të mbërrijë në Kuvend vetëm me emrat e Bekim Salit, për zëvendëskryeministër të parë i ngarkuar për integrimet evropiane, si dhe të Muhamet Hoxhës për ministër të Mjedisit Jetësor dhe Planifikimit Hapësinor.
“Marrëveshja është që të plotësohen vendet e lira, pas fitores së Izet Mexhitit në komunën e Çairit. Nuk kemi biseduar për ndryshime në resorë të tjerë. Nëse do të ketë propozim të ri apo ndonjë rokadë të mundshme të resorëve, do të bisedojmë kur të bëjmë rekonstruksionin e madh”, tha për TV24 funksionari i lartë qeveritar.
Sipas informacioneve nga “Vlen”, plani i tyre ishte që në vend të Azir Aliut të vinte Bashkim Bakiu, ndërsa Aliu të emërohej drejtor i AEK-ut. Ndërkohë, ministri aktual për Integrime Evropiane ishte paraparë të dërgohej në Bruksel si ambasador. Sipas burimeve nga VMRO-DPMNE, nuk përjashtohet që gjatë negociatave për rekonstruksion, resori i Shëndetësisë të jetë ai ku mund të ketë rokada.
