Ministrat e brendshëm të vendeve të Bashkimit Evropian u takuan për të diskutuar mbi hyrjen masive të emigrantëve marokenë në enklavën spanjolle në Afrikë, Ceuta.
Ministri i Brendshëm i Spanjës, Fernando Grande-Marlaska, e vlerësoi takimin si konstruktiv dhe bëri të ditur se edhe shtetet anëtare e vlerësuan reagimin të menjëhershëm dhe efikas.
Grande-Marlaska theksoi se shërbimet spanjolle të inteligjencës nuk patën marrë paraprakisht asnjë informacion apo paralajmërim për hyrje masive e emigrantëve në Ceuta.
“Nuk pati asnjë raport dhe asnjë paralajmërim. Fatkeqësisht, situata të tilla mund të ndodhin, por është e rëndësishme të theksohet se ne jemi të përgatitur të reagojmë menjëherë ndaj krizave të këtij lloji”, ka thënë Grande – Marlaska.
Sipas tij, rreth 70 mijë nga 72 mijë emigrantët që hynë në Ceuta janë larguar tashmë nga territori.
Grande-Marlaska theksoi gjithashtu se zona Schengen nuk u rrezikua në asnjë moment, pasi Ceuta, e cila ndodhet në Afrikën e Veriut, nuk është pjesë e marrëveshjes Schengen.
Irlanda, e cila mban aktualisht presidencën e radhës të Këshillit të Bashkimit Evropian e kryesoi takimin e ministrave të Brendshëm të vendeve anëtare.
Ministri irlandez i Drejtësisë dhe Çështjeve të Brendshme, Jim O’Callaghan, tha se blloku mbetet i bashkuar në mbështetje të Spanjës dhe i vendosur për mbrojtjen e kufijve të jashtëm të bllokut.
“Bashkimi Evropian është i bashkuar dhe është i gatshëm të mbështesë Spanjën, si dhe të mbrojë kufijtë e jashtëm nga migracioni i paligjshëm. Kufijtë e jashtëm të BE-së janë përgjegjësi e përbashkët dhe migracioni kërkon një përgjigje të koordinuar në nivel evropian”, është shprehur O’Callaghan.
Ai vlerësoi reagimin e shpejtë të autoriteteve spanjolle ndaj situatës në Ceuta, ndërsa shprehu ngushëllimet për viktimat.
Ministri irlandez theksoi se takimi u dha vendeve anëtare mundësinë t’i vlerësojnë mekanizmat ekzistues dhe t’i identifikojnë fushat ku nevojitet bashkëpunim më i ngushtë.
Edhe ministri danez i Emigracionit, Morten Bodskov, e mirëpriti takimin e ministrave të BE-së, duke theksuar se është jashtëzakonisht e rëndësishme që të kihet kontroll mbi kufijtë e Bashkimit Evropian.
Danimarka ka qenë ndër vendet më kritike për situatën në Spanjë, por pas takimit, dha qëndrim më të butë.
Ministri Bodskov vlerësoi reagimin e shpejtë të autoriteteve spanjolle, ndërsa theksoi se presioni mbi kufijtë e jashtëm të BE-së kërkon përgjigje të menjëhershme dhe të vendosur.
Në përfundim të takimit, anëtarët e Bashkimit Evropian ritheksuan angazhimin për ta forcuar luftën kundër rrjeteve të kontrabandës së emigrantëve dhe për të përmirësuar shkëmbimin e informacionit dhe monitorimin e situatës, me synim parandalimin e krizave të ngjashme në të ardhmen.
