Partia në pushtet, Bashkimi Demokratik për Integrim edhe sot ka vazhduar ta kritikojë opozitën shqiptare në Maqedoninë e Veriut. Akuzon, se ajo duke u endur korridoreve të VMRO-DPMNE-së dhe Lidhjes Socialdemokrate të Maqedonisë(LSDM) është duke bërë përpjekje që të mos realizohen kërkesat shqiptare.
“Në vend se të largoheni nga qëndrimi jodinjitoz prapa derës dhe
korridoreve të LSDM dhe VMRO me lutje ndaj tyre që të mos realizohen
kërkesat shqiptare, ju vendoset që të braktisni Tryezën e përbashkët të
partive parlamentare shqiptare. Populli shqiptar nuk do të jua fal asnjëherë këtë nënçmim dhe këtë sjellje jodinjitoze të opozitës shqiptare”, thuhet mes të tjerash në kumtesën e BDI-së.
Vlerësojnë se shqiptarët nuk e meritojnë një opozitë, siç thonë, pa kapacitete demokratike dhe pa moral politik për të bartur përgjegjësi para votuesve dhe para organeve partiake. Pyesin, se kur ajo, opozita do ta lirojë skenën e uzurpuar?
“Kur do ta lironi skenën e uzurpuar opozitare të mbushur me rekord
humbje? Premtuat publikisht se do të dorëhiqeni për humbjen tuaj, tregohuni dinjitoz, mbajeni fjalën dhe shfaqni kapacitet demokratik e mos i
nënçmoni shqiptarët”, thuhet më tej në kumtesë.
Akuzojnë opozitën, se “vazhdimisht ndryshon qëndrime dhe se kushte vendosin vetëm për shqiptarët”, ndërkaq shtojnë se “BDI dhe lideri i saj, Ali Ahmeti do të vijojnë me përpjekjet për të patur një opozitë dinjitoze dhe kombëtare sepse këtë e meritojnë votuesit opozitar dhe populli shqiptar”./TV21
