Kryetari i Lëvizjes Vetëvendosje do të mbledh sot Kryesinë e partisë për të diskutuar lidhur me nominimin e kandidatit për kryeministër të ardhshëm.
Kryesia e Lëvizjes Vetëvendosje, në këtë takim do të shqyrtojë mundësinë e propozimit të mandatarit për formimin e qeverisë – siç paralajmëroi Albin Kurti një ditë më parë.
Ndërkaq, presidenti Thaçi dje ka njoftuar përmes një shkrimi në Facebook për kohën që i ka dhënë në dispozicion Kurtit para mandatimit për kryeministër.
“Prandaj, kam vendosur që t’i ofroj z. Kurti kohë shtesë edhe 48 orët e ardhshme për nominimin e kandidatit/kandidates për kryeministër të ardhshëm të Qeverisë së Republikës së Kosovës, para se të marr veprimet e radhës kushtetuese dhe ligjore.”
Presidenti Thaçi, po ashtu tha se Kurti nuk ishte i gatshëm që sot të ofrojë propozimin e të nominuarit nga Lëvizja Vetëvendosje.
Të hënën, pas takimit konsultativ me presidentin Hashim Thaçi, Kurti u shpreh se është pajtuar që t’ia dërgojë presidentit emrin e kandidatit përmes një shkrese zyrtare gjatë ditëve të ardhshme, por nuk tregoi saktësisht se në cilën ditë do ta bëjë këtë.
