Kryetarja e Kuvendit të Kosovës Vjosa Osmani, ka folur pas nënshkrimit të marrëveshjes Kosovë-Serbi në Uashington.
Ajo ka vlerësuar njohjen nga Izraeli si një prej njohjeve më të rëndësishme që i ka ardhur Kosovës qe një kohë të gjatë.
Mirëpo, Osmani ka kritikuar delegacionin e Kosovës, duke thënë se ai nuk arriti t’i sjellë vendit ato që i premtoi qytetarëve dhe Kuvendit, përcjell Bota sot.
Sipas saj, delegacioni nuk arriti të sjellë njohjen e ndërsjellë me Serbinë dhe futi në negociim edhe Liqenin e Ujmanit.
Reagimi i Osmanit në Facebook:
Njohja nga Izraeli është një prej njohjeve më të rëndësishme që i ka ardhur Kosovës qe një kohë të gjatë. Kjo edhe njëherë dëshmoi se që nga shpallja e pavarësisë sonë, Shtetet e Bashkuara kanë rol ekzistencial në përkrahjen dhe konsolidimin e subjektivitetit ndërkombëtar te Kosovës.
Në anën tjetër, delegacioni i Kosovës nuk arriti t’i sjellë vendit pikërisht ato që i premtoi qytetarëve dhe Kuvendit qe një kohë të gjatë:
– Njohjen e ndërsjellë me Serbinë
– Mosnegociimin e shfrytëzimit të resurseve (siç është Ujmani)
– Mospranimin e Mini-Schengenit (ose siç e quanin mini-Jugosllavi)
– Mosprekjen e kushtetutës dhe deklaratës së pavarësisë (meqë për 1 vit u hoq dorë dhe u shpall moratorium mbi nenin 17 të kushtetutës dhe nenet 8 e 9 të deklaratës së pavarësisë)
– Rezultate konkrete për të pagjeturit
– Dëmshpërblim për reparacionet e luftës
– Përgjegjësi të Serbisë për krimet e kryera në Kosovë
– Eliminim të plotë të barrierave jotarifore që Serbia i ka vënë Kosovës.
