Bulevardi “Boris Trajkovski” dhe nyja rrugore te “Momin Potok” janë në fazën përfundimtare të realizimit, ndërsa po intensifikohen punimet për funksionalizimin e bulevardit “Maqedonia” dhe rrugës së parë nëntokësore në Shkup, njofton VMRO-DPMNE.
Sipas partisë, po punohet edhe në zgjerimin e rrugëve lidhëse, ndërtimin e urës së re në Karposh, që do të lidhë rrugët “Lubjanska” dhe “Skupi”, si dhe përgatitjen e bulevardit “ASNOM” dhe vënien në funksion të urës “Gjeneral Mihajlo Apostolski”.
VMRO-DPMNE paralajmëron gjithashtu përmirësimin e transportit publik përmes blerjes së 100 autobusëve ekologjikë dhe realizimit të projektit të transportit të shpejtë me autobusë.
Ndër projektet e tjera përmenden ndërtimi i impiantit të trajtimit të ujërave të zeza në Trubarevë dhe krijimi i një parku të madh në Vardarishte.
Sipas VMRO-DPMNE-së, këto investime synojnë lehtësimin e komunikacionit, lidhjen më të mirë të lagjeve dhe përmirësimin e infrastrukturës së kryeqytetit./Skopjeinfo.mk
