Presidenti amerikan Donald Trump ka pezulluar një pjesë të sanksioneve ndaj Rusisë, të cilat duhej të hynin në fuqi pas dy ditësh, duke u thirrur në interesin kombëtar të SHBA-së. Vendimi vjen në një kohë kur marrëdhëniet mes Uashingtonit dhe Kievit po përkeqësohen sërish.
Sanksionet ishin miratuar nga Kongresi dhe nënshkruar nga Trump në shtator. Paketa parashikonte tarifa deri në 100 për qind për importet nga vendet që blejnë naftë dhe gaz rus, veçanërisht Kina dhe India, si dhe masa ndaj zyrtarëve rusë, institucioneve financiare dhe anijeve që përdoren për të anashkaluar kufizimet.
Vendimi i Trumpit nxiti kritika në Kongresin amerikan. Kongresmeni demokrat Don Beyer e akuzoi administratën se po tërhiqet përballë Moskës dhe po shpërfill vullnetin e Kongresit.
Përplasja për naftën ruse
Tensionet mes Trumpit dhe presidentit ukrainas Volodymyr Zelensky u shtuan pas vendimit për të lejuar importin e naftës dizel ruse në SHBA, me synimin për të ulur çmimet e energjisë, të rritura në kontekstin e konfliktit me Iranin.
Zelensky kritikoi marrëveshjen, duke argumentuar se blerja e energjisë ruse kontribuon në financimin e luftës së Moskës kundër Ukrainës.
Trump pretendoi më pas se Rusia dhe Ukraina ishin pajtuar për një armëpushim energjetik, që do të kufizonte sulmet ndaj infrastrukturës energjetike. Zelensky deklaroi se Ukraina do t’i ndalte sulmet nëse edhe Rusia vepronte njësoj.
Pas sulmeve të reja ruse, Kievi rifilloi goditjet ndaj rafinerive ruse. Trump i cilësoi ato si „të turpshme”, ndërsa Zelensky u përgjigj se Ukraina po mbron interesat e saj.
Përplasje edhe për Starlinkun dhe inteligjencën
Marrëdhëniet u tensionuan më tej pasi Zelensky akuzoi palën amerikane se po ngadalësonte qëllimisht qasjen në rrjetin satelitor Starlink, të përdorur nga ushtria ukrainase për komunikim dhe operacione mbrojtëse.
Ai pretendoi gjithashtu se Uashingtoni kishte kufizuar shkëmbimin e informacioneve të inteligjencës. Trump i mohoi akuzat, ndërsa Zelensky deklaroi të premten se shpejtësia e Starlinkut ende nuk ishte rikthyer plotësisht.
Retorika mes dy presidentëve është ashpërsuar. Në një samit të Bashkimit Evropian, Zelensky tha se ishte mirë që ndodhej mes „liderëve të vërtetë”, pasi Trump kishte deklaruar më herët se presidenti ukrainas ishte „më i vështirë për bashkëpunim” sesa Vladimir Putini.
