Sot (01.08.2026), zyrtarët policorë të SPB Tetovë, lidhur me videon e publikuar në rrjetet sociale ku shfaqeshin të shtëna me armë gjatë një ahengu familjar në Dobërdoll të Gostivarit, kanë kryer bastisje në disa lokacione. Gjatë aksionit janë arrestuar gjashtë persona, ndërsa një person është ftuar për bisedë zyrtare. Në bastisje janë gjetur dhe sekuestruar armë dhe municion.
Në ora 18:00 është kryer bastisje te I.S. (21) nga Dobërdolli, ndërsa në ora 18:05 edhe te A.I. (30), ku është gjetur dhe sekuestruar një pistoletë gazi. Në të njëjtën kohë është kryer kontroll edhe te I.B. (25) nga i njëjti fshat.
Në ora 18:15 është bastisur shtëpia e B.A. në Dobërdoll, ku janë gjetur 30 fishekë për pistoletë gazi, ndërsa në oborr janë gjetur 27 gëzhoja të shkrepura nga pistoletë gazi dhe një fishek për armë gjahu. Janë arrestuar B.A. (46) dhe djali i tij M.A. (21).
Më pas, në ora 18:25 është kryer bastisje te T.M. (26), ku janë gjetur dhe sekuestruar një pistoletë me tetë fishekë, një pushkë gjahu me shtatë fishekë dhe një pistoletë gazi. Pas kësaj ai është arrestuar, ndërsa S.M. është ftuar për bisedë zyrtare.
Të gjithë personat janë shoqëruar në stacion policor për procedura të mëtejshme. Pas dokumentimit të plotë të rastit, ndaj tyre do të ngrihen kallëzime përkatëse.
