Pianistja shqiptare Nikol Tuka, një nga emrat më premtues të muzikës klasike shqiptare, ka shkëlqyer si soliste në koncertin e Orkestrës Simfonike të RTSH-së, duke interpretuar Koncertin nr. 1 për piano dhe orkestër të kompozitorit të madh Ludwig van Beethoven, transmeton albinfo.ch.
Koncerti u mbajt në Sallën e Universitetit të Arteve në Tiranë, nën dirigjimin e maestros Facundo Agudin, dhe u mirëprit nga publiku, i cili e vlerësoi interpretimin e pianistes me duartrokitje të gjata.
Fituese e mbi 40 çmimeve kombëtare dhe ndërkombëtare, Nikol Tuka është diplomuar në Universitetin e Arteve në Tiranë dhe aktualisht vazhdon studimet master në Gjermani. Ajo është vlerësuar për muzikalitetin, virtuozitetin dhe interpretimet e saj artistike, duke ndërtuar një karrierë të suksesshme si brenda ashtu edhe jashtë vendit.
Interpretimi i saj me Orkestrën Simfonike të RTSH-së përbën një tjetër sukses në rrugëtimin artistik të pianistes shqiptare, e cila vazhdon të afirmohet si një nga talentet më të spikatura të brezit të ri në skenën e muzikës klasike./Albinfo.ch
