U largua nga Shqipëria në moshën 16-vjeçare me një bursë studimi në SHBA, ndërsa sot kontribuon në zhvillimin e teknologjive të avancuara për misionet hapësinore të NASA-s, transmeton albinfo.ch.
Një tjetër histori suksesi vjen nga shqiptarët që kanë arritur të ndërtojnë karrierë në institucionet më prestigjioze në botë. Armian Hanelli, i cili u largua nga Shqipëria në moshën 16-vjeçare pasi fitoi një bursë studimi në Shtetet e Bashkuara të Amerikës, është sot pjesë e Administratës Kombëtare të Aeronautikës dhe Hapësirës (NASA).
Falë përkushtimit, punës së palodhur dhe pasionit për shkencën e teknologjinë, Hanelli ndërtoi një karrierë të suksesshme në fushën e inxhinierisë elektrike. Para se t’i bashkohej NASA-s, ai fitoi përvojë profesionale në kompaninë e njohur të teknologjisë Intel, një nga liderët botërorë në industrinë e mikroprocesorëve dhe teknologjisë.
Sot, si pjesë e NASA-s, Armian Hanelli punon në projekte të teknologjisë së avancuar, duke kontribuar në zhvillimin e inovacioneve që mbështesin misionet hapësinore dhe kërkimin shkencor.
Rrugëtimi i tij është një dëshmi se arsimi cilësor, këmbëngulja dhe puna e vazhdueshme mund t’i çojnë të rinjtë shqiptarë drejt institucioneve më prestigjioze në botë.
Historia e Armian Hanellit mbetet një shembull frymëzues për brezin e ri, duke treguar se me vizion, përkushtim dhe besim në aftësitë e veta, ëndrrat më të mëdha mund të bëhen realitet./Albinfo.ch
