Ukraina ka testuar një interceptor të ri me shpejtësi të lartë, të zhvilluar nga kompania estoneze e teknologjisë Alatyr Group, në përpjekje për të përballuar kërcënimin në rritje nga dronët rusë me motor reaktiv.
Sipas kompanisë me bazë në Talin, sistemi i quajtur P4P është projektuar posaçërisht për të interceptuar dronë të shpejtë që mund të arrijnë deri në rreth 500 kilometra në orë, një kategori mjetesh ajrore pa pilot që Rusia po përpiqet ta integrojë gjithnjë e më shumë në arsenalin e saj.
Ndryshe nga interceptorët tradicionalë FPV, P4P përdor shtytje raketore për të mbyllur me shpejtësi distancën me objektivin.
Sistemi ngrihet vertikalisht si një dron shumëhelikësh (multikopter), por më pas transformohet në një mjet sulmues me karakteristika të ngjashme me raketat.
Trupi i tij cilindrik dhe i zgjatur është projektuar për performancë më të mirë aerodinamike gjatë fluturimeve horizontale me shpejtësi të lartë.
Sipas zhvilluesve, sistemi pajiset fillimisht me katër motorë elektrikë, të cilët e ngrenë interceptorin nga toka. Menjëherë pas ngritjes aktivizohet një përshpejtues raketor, që e shtyn dronin drejt objektivit me shpejtësi të lartë.
Zhvillimi i P4P vjen në një moment kur Ukraina dhe partnerët e saj po kërkojnë mënyra më të lira dhe më efektive për mbrojtje ajrore, ndërsa Rusia po intensifikon sulmet masive me dronë dhe po eksperimenton me modele më të shpejta, më të vështira për t’u ndaluar nga sistemet ekzistuese.
