Bashkëkryetari i VLEN-it, Bilall Kasami, në intervistë për “360 Gradë” në RTM1 tha se partia e sapoformuar po përgatit një platformë të quajtur “Agjenda Kombëtare 2036”. Fokusi, sipas Kasamit, do të jetë në zgjidhje për kushte më të mira dhe zhvillim të shtetit, me qëllim uljen e emigrimit të të rinjve.
“Është një vizion i ri për shtetin, ku duam të tregojmë se, ashtu si edhe zgjidhjet e deritanishme, shqiptarët janë të gatshëm të kontribuojnë seriozisht që ky shtet të jetë më i zhvilluar, të krijojë kushte të mira për zhvillimin e të gjithë të rinjve në këtë shtet. Në këtë drejtim, ne do të përgatisim një platformë se si i shohim shqiptarët si një faktor të rëndësishëm në zhvillimin e këtij shteti, si në procesin e integrimeve evropiane, ashtu edhe në procesin e mbajtjes së të rinjve që të mos largohen nga vendi, sepse shohim këto ditë se në media qarkullon deklarata e ministrit të Transportit ku thotë se vendit i duhen 40–50 mijë fuqi punëtore nga jashtë. Pra, që kjo shifër të mos rritet edhe më shumë, ne duhet të punojmë që të rinjtë tanë të qëndrojnë këtu”, tha Kasami.
I pyetur se sa është VLEN pjesë e projekteve të mëdha infrastrukturore në vend, Kasami tha se janë të informuar për të gjitha investimet e mëdha dhe se po punohet intensivisht në gjithë territorin e shtetit, pa ndarje rajonale.
“Një nga sulmet kryesore kur u formua qeveria e re ishte se me ardhjen e VMRO-së të gjitha projektet në pjesën perëndimore të vendit do të ndërpriteshin dhe paratë do të orientoheshin në pjesën lindore. Kjo nuk ndodhi. E dimë që edhe sot po punohet, qeveria është në terren për inspektim të punimeve në pjesën e Korridorit 8, intensiteti i investimeve përgjatë Korridorit 8 është dhjetë herë më i lartë krahasuar me periudhën para se të vinim ne në pushtet. Gjithashtu, shumë shpejt do të promovohet fillimi i punimeve edhe në autostradën Shkup–Bllacë, po punojmë së bashku që sa më shpejt të shpallet tenderi për tunelin e rrugës Tetovë–Prizren”, shtoi Kasami.
