Izraeli kreu disa sulme ajrore në Libanin jugor që vranë të paktën 10 persona, ndërsa grupi militant Hezbollah tha se qëlloi me raketa dhe dronë në Izraelin verior ku u plagosën dy ushtarë.
Ushtria izraelite dhe Hezbollahu vazhduan sulmet e tyre pavarësisht armëpushimit në fuqi që nga 17 prilli.
Ushtria izraelite të premten pasdite u bëri thirrje banorëve të fshatit libanez Habboush pranë qytetit jugor të Nabatiyeh të evakuohen, duke paralajmëruar se ata që janë afër objekteve të Hezbollahut do të ishin në rrezik. Një sulm ajror në Habboush që ndodhi rreth kohës së paralajmërimit vrau gjashtë persona , përfshirë një grua dhe një fëmijë, dhe plagosi tetë, tha Ministria e Shëndetësisë.
Agjencia shtetërore Kombëtare e Lajmeve raportoi se katër persona u vranë në sulmet ajrore në tre fshatra të tjerë në jug.
Deri të premten pasdite, Hezbollahu kishte lëshuar gjashtë deklarata duke thënë se kishte lëshuar dronë dhe raketa në pozicionet ushtarake izraelite.
Ushtria izraelite konfirmoi se Hezbollahu lëshoi një dron shpërthyes që ra në Izraelin verior pranë kufirit me Libanin. Mediat izraelite raportuan se një sulm me dron pranë Margaliot në Izraelin verior shkaktoi një zjarr dhe se dy ushtarë u plagosën lehtë në një përplasje të veçantë të një droni të Hezbollahut në zonë.
Shkëmbimet e të premtes erdhën pasi ndihmësit mjekësorë në Libanin jugor nxorën trupat e pesë personave, përfshirë një burrë dhe tre djemtë e tij, nga rrënojat në fshatin Kfar Rumman, gjithashtu pranë Nabatiyeh, një ditë pasi ata u vranë.
Agjencia Kombëtare e Lajmeve raportoi se të pesë personat u vranë në një sulm ajror të enjten vonë në Kfar Rumman. Agjencia identifikoi ata, trupat e të cilëve u gjetën, si Malek Hamza dhe djemtë e tij, Ali, Fadel dhe Hamza. Ajo tha se sulmi vrau gjithashtu një ushtar libanez . Ushtria libaneze konfirmoi se një ushtar, Ali Jaber, u vra në sulm.
