Një zyrtar i Shtëpisë së Bardhë ka thënë se presidenti amerikan, Donald Trump po “mbështet udhëheqjen e Shërbimit Sekret” pas sulmit në një hotel në Uashington DC të shtunën.
Zyrtari thotë se Trumpi mendon se agjentët e tij “bënë një punë të shkëlqyer duke neutralizuar autorin e sulmit dhe duke zhvendosur presidentin, Zonjën e Parë, zëvendëspresidentin dhe kabinetin në një vend të sigurt”.
Shtëpia e Bardhë ka thënë gjithashtu se këtë javë do të zhvillohet një takim për të diskutuar procedurat e sigurisë.
Cole Tomas Allen, 31 vjeç, u arrestua pasi dyshohet se ka hapur zjarr pranë një pike kontrolli sigurie në hollin e hotelit, teksa darka po mbahej një kat më poshtë.
Allen, nga Kalifornia, do të akuzohet zyrtarisht në një seancë dëgjimore në Uashington të hënën. Ai e përshkruan veten si një “zhvillues lojërash dhe mësues”.
Në një intervistë pas të shtënave në Darkën e Korrespondentëve, Trumpi ka thënë “Nuk isha i shqetësuar. E kuptoj jetën. Jetojmë në një botë të çmendur”.
