Për herë të parë që nga viti 2003, Shtetet e Bashkuara kanë vendosur njëkohësisht tre aeroplanmbajtëse në Lindjen e Mesme, duke rritur ndjeshëm praninë ushtarake në rajon.
Sipas U.S. Central Command, në zonë operojnë aktualisht USS Abraham Lincoln (CVN-72), USS Gerald R. Ford (CVN-78) dhe USS George H.W. Bush (CVN-77).
Tre aeroplanmbajtëset shoqërohen nga një flotë prej 12 anijesh luftarake, përfshirë disa shkatërrues, ndërsa në total në rajon ndodhen më shumë se 200 avionë luftarakë dhe rreth 15,000 trupa. Flota ajrore përfshin avionë të avancuar si F/A-18 Super Hornet, EA-18G Growler për luftë elektronike, F-35C Lightning II, si dhe avionë mbështetës dhe transporti.
Sipas përditësimit të fundit të U.S. Central Command, aeroplanmbajtësja USS George H.W. Bush (CVN-77) është pozicionuar në Oqeanin Indian, brenda zonës së përgjegjësisë së komandës amerikane, duke forcuar praninë strategjike në rajon.
USS George H.W. Bush (CVN-77) është një nga anijet më të avancuara të klasit Nimitz, e aftë të transportojë rreth 5,000 persona dhe mbi 60 avionë. Ajo fuqizohet nga dy reaktorë bërthamorë, duke i mundësuar operim për më shumë se 20 vite pa furnizim me karburant.
USS Abraham Lincoln (CVN-72), një tjetër anije e klasit Nimitz, ka një gjatësi prej 336 metrash dhe peshë mbi 100,000 ton. Me një ekuipazh prej rreth 5,400 personash, ajo mund të transportojë deri në 90 avionë dhe helikopterë, si dhe sasi të mëdha karburanti për operacione të zgjatura.
Ndërkohë, USS Gerald R. Ford (CVN-78) përfaqëson gjeneratën më të re të aeroplanmbajtëseve amerikane. E dorëzuar në vitin 2017, ajo kushtoi rreth 17 miliardë dollarë dhe mund të mbajë rreth 75 avionë, me një ekuipazh prej mbi 4,500 personash.
Vendosja e tre aeroplanmbajtëseve në të njëjtën kohë në Lindjen e Mesme konsiderohet një lëvizje e rëndësishme strategjike, që tregon rritjen e gatishmërisë ushtarake të SHBA-së në rajon. Një prani e tillë nuk është parë prej më shumë se dy dekadash dhe vjen në një moment tensionesh të larta gjeopolitike.
Kjo forcë e konsiderueshme detare dhe ajrore i jep SHBA-së kapacitete të zgjeruara për operacione ushtarake, mbrojtje të interesave strategjike dhe reagim të shpejtë ndaj çdo zhvillimi në rajon.
Top Channel
