Turqia ka lëshuar një paralajmërim për Greqinë pas raportimeve për aktivitete ushtarake greke në Egjeun Lindor, duke thënë se Athina zyrtare po shkel statusin e demilitarizuar të ishujve sipas traktateve të paqes të Lozanës së vitit 1923 dhe Parisit të vitit 1947.
“Iniciativat e Greqisë që shkelin statusin e ishujve në kundërshtim me traktatet e përfunduara, krijojnë paligjshmëri dhe dëmtojnë marrëdhëniet tona fqinje dhe aleate”, ka deklaruar ministria e Mbrojtjes Kombëtare në një konferencë javore për shtyp të enjten.
“Ne nuk i pranojmë iniciativat e Greqisë që nuk i shërbejnë qëllimit të vërtetë dhe synojnë t’i shndërrojnë krizat në rajonin tonë, në mundësi”, ka thënë më tej ministria.
Turqia gjithashtu ka vendosur një sistem mbrojtës raketor Patriot të NATO-s në Malatya dhe ka stacionuar gjashtë avionë luftarakë F-16 së bashku me sisteme mbrojtëse ajrore në Republikën Turke të Qipros Veriore (TRNC), ndërsa pasojat e luftës SHBA-Izrael kundër Iranit po vazhdojnë të prekin edhe territorin turk.
Zëdhënësi i ministrisë, admirali Zeki Akturk, ka konfirmuar se një sistem Patriot i caktuar nga Komanda Ajrore Aleate e NATO-s (AIRCOM) në Ramstein të Gjermanisë, po vendoset në Malatya si një element plotësues i arkitekturës së mbrojtjes ajrore të Turqisë.
Akturk ka thënë më tej se një raketë e dytë balistike iraniane është kapur më 9 mars pasi kishte hyrë në hapësirën ajrore turke, teksa mbeturinat kishin rënë në tokë të zbrazët si në Gaziantep ashtu edhe në Diyarbakir, konfirmimi i parë se fragmente arritën gjithashtu në Diyarbakir.
Nuk është raportuar për viktima ose lëndime në asnjërën vendndodhje.
