Britania e Madhe dhe Franca kanë vendosur të dërgojnë avionë luftarakë dhe anije ushtarake në Lindjen e Mesme për të mbrojtur qytetarët dhe interesat e tyre, ndërsa konflikti mes SHBA-ve, Izraelit dhe Iranit vazhdon të përshkallëzohet.
Edhe pse të dy vendet kanë shprehur rezerva ndaj ofensivës amerikano-izraelite kundër Iranit, ato kanë njoftuar se do të përdorin flotën dhe forcat ajrore për të ndihmuar në përballimin e sulmeve hakmarrëse iraniane në rajon.
Presidenti francez Emmanuel Macron deklaroi se Franca do të dërgojë sisteme të mbrojtjes ajrore dhe një anije luftarake për të mbrojtur Qipron, ndërsa paralajmëroi se situata në rajon mund të përshkallëzohet më tej.
Ai shtoi gjithashtu se dëshiron të krijojë një koalicion ndërkombëtar për mbrojtjen e rrugëve tregtare detare, të cilat i cilësoi si jetike për ekonominë globale.
Franca ka njoftuar se do të kontribuojë me aeroplanmbajtësen “Charles de Gaulle” në këtë iniciativë.
Ndërkohë, avionët luftarakë Rafale të Francës janë vendosur mbi Emiratet e Bashkuara Arabe, ku kanë ndërhyrë për të neutralizuar dronë që kërcënonin hapësirën ajrore të vendit dhe potencialisht një bazë ushtarake franceze në Abu Dhabi.
Britania e Madhe ka njoftuar gjithashtu se do të dërgojë një anije luftarake në Mesdhe dhe helikopterë me sisteme kundër dronëve, pas një sulmi ndaj një baze ushtarake britanike në Qipro.
Presidenti amerikan Donald Trump ka kritikuar publikisht kryeministrin britanik Keir Starmer për refuzimin e tij për të mbështetur sulmet fillestare ndaj Iranit, duke e akuzuar se po dëmton marrëdhëniet mes Londrës dhe Washington-it.
Duke folur në parlamentin britanik, Starmer mbrojti vendimin e tij dhe theksoi se Britania po vendos avionë luftarakë, anije dhe sisteme kundër dronëve në rajon në një rol mbrojtës, përfshirë në Qipro.
Ai shtoi se Londra ka rënë dakord që Shtetet e Bashkuara të përdorin bazat britanike për të goditur raketat dhe lëshuesit iranianë, por theksoi se Britania nuk do të hyjë në luftë pa një bazë të qartë ligjore dhe një plan të qartë ushtarak.
“Nuk isha i gatshëm që Britania të hynte në një luftë pa një bazë ligjore dhe një plan të menduar mirë. Ky mbetet qëndrimi im”, tha Starmer.
