Në përvjetorin e dytë të vdekjes së udhëheqësit të opozitës ruse Alexei Navalny, nëna e tij Lyudmila Navalny kërkoi drejtësi për të birin.
Duke iu referuar hetimit të pesë vendeve evropiane, i cili arriti në përfundimin se udhëheqësi i opozitës ishte helmuar me një toksinë të rrallë, ajo tha se ky hetim konfirmon atë që dihej që nga fillimi.
“Ne e dinim që djali ynë nuk vdiq thjesht në burg. Ai u vra”, u tha ajo gazetarëve të mbledhur pranë varrit të tij në Moskë.
“Kanë kaluar dy vjet dhe tani e dimë se me çfarë është helmuar. Mendoj se do të duhet kohë dhe përfundimisht do ta zbulojmë se kush e bëri”, shtoi ajo.
Disa dhjetëra njerëz u mblodhën sot në Moskë te varri i Alexei Navalny-t, një kundërshtar i madh i Kremlinit, i cili vdiq në burg më 16 shkurt 2024. Ai ishte 47 vjeç.Britania e Madhe, Franca, Gjermania, Suedia dhe Holanda njoftuan dy ditë më parë se Navalny u helmua në një koloni penale dy vjet më parë.
Pesë qeveritë thanë në një deklaratë të përbashkët se përfundimi i tyre bazohej në analizat e mostrave të trupit të Navalny-t, të cilat, sipas tyre, konfirmonin qartë praninë e epibatidinës, një toksinë që rrjedh nga bretkosat helmuese që jetojnë në Amerikën e Jugut.
Navalny vdiq në një koloni penale në Arktik në shkurt të vitit 2024, dhe ekipi i tij dhe gruaja e tij, Yulia Navalny, akuzojnë Presidentin Vladimir Putin për urdhërimin e vrasjes.
© SYRI.net
