Ish zëvendës presidentja amerikane Kamala Harris ka dhënë këtë javë sinjale të qarta se po punon për të mbajtur të gjallë një tjetër kandidim për Shtëpinë e Bardhë në vitin 2028, raporton Axios.
Pavarësisht shqetësimeve të disa drejtuesve të Partisë Demokratike dhe donatorëve se ajo mund të ketë vështirësi për të fituar zgjedhjet, Harris vazhdon të renditet në krye ose pranë kryesimit në shumicën e sondazheve paraprake për primaret demokrate të 2028-s.
Ajo gëzon gjithashtu mbështetje të fortë nga votuesit afro-amerikanë, një bllok vendimtar në garat e fundit brenda partisë.
Pas një periudhe tërheqjeje nga skena publike në fillim të vitit dhe më pas një turi librash të fokusuar te zgjedhjet e 2024-s, Harris ndërmori disa lëvizje këtë javë që shumë demokratë i shohin si hapat e parë të një fushate të re presidenciale.
Ndërkohë, figura të tjera të mundshme për vitin 2028 ishin gjithashtu të pranishme në Los Angeles.
Guvernatori i Kalifornisë, Gavin Newsom, zhvilloi takime me anëtarë të Komitetit Kombëtar Demokrat.
Sipas sondazheve të Morning Consult, Harris kryeson vazhdimisht ndaj rivalëve të mundshëm, përfshirë Newsom, dhe del përpara edhe në përballje hipotetike me zëvendës presidentin republikan J.D. Vance.
