Plani i ri i sigurisë globale i presidentit të SHBA-së, Donald Trump, ka hequr çdo referencë për denuklearizimin e Koresë së Veriut si qëllim, duke nxitur spekulime se Uashingtoni mund të përpiqet të rrisë shanset për një përparim diplomatik me Phenianin në vitin 2026.
Objektivi i përfundimit të kërcënimit bërthamor të Koresë së Veriut ka qenë konstant në Strategjinë e Sigurisë Kombëtare të çdo presidenti të SHBA-së që nga shfaqja e programit të Phenianit në vitin 2003, por mungonte në dokumentin e bërë publik të premten, raporton Reuters.
Mospërfshirja e përmendjes së Koresë së Veriut dhe programit të saj të përshpejtuar për të ndërtuar armë bërthamore që mund të transportohen nga raketa balistike të afta për të goditur SHBA-në, po nxit pritjet për një ringjallje të mundshme të bisedimeve midis Trumpit dhe Kim Jong Un, të mbajtura për herë të fundit në vitin 2019.
Trumpi ka folur për gatishmërinë e tij për t’u ulur me udhëheqësin e Koresë së Veriut në një mënyrë “proaktive”, duke treguar se ai “dëshiron të bëjë diçka duke ndërmarrë disa veprime”, ka thënë Hong Min i Institutit Korean për Unifikimin Kombëtar.
“Pastaj mendoj se ekziston një shkallë e caktuar qëllimi të vetëdijshëm atje, se ideja e denuklearizimit… nuk ka nevojë të përmendet këtu”, ka shtuar Hong, një ekspert i të menduarit strategjik të Phenianit.
Në planin e mëparshëm të sigurisë të Trumpit të lëshuar gjatë mandatit të tij të parë në 2017, Koreja e Veriut u përmend 16 herë si një “kërcënim për atdheun tonë” dhe një shtet mashtrues që mund të “përdorë armë bërthamore kundër Shteteve të Bashkuara”.
Si Koreja e Jugut ashtu edhe Shtetet e Bashkuara mohuan të hënën se kishte ndonjë ndryshim politikash mbi Korenë e Veriut, duke theksuar se denuklearizimi mbetet qëllimi.
Megjithatë, Kim e ka bërë të qartë se takimi i tyre për bisedime varet nga natyra e tyre dhe se ai dhe Trumpi do të duhet të takohen si udhëheqës të barabartë të shteteve bërthamore.
“Koncepti i ‘denuklearizimit’ tashmë e ka humbur kuptimin e tij. Ne jemi bërë një shtet bërthamor”, i ka thënë Kim parlamentit në shtator.
“Unë them se ‘denuklearizimi’ është gjëja e fundit që mund të presin nga ne”.
“Nëse Shtetet e Bashkuara, duke u çliruar nga ndjekja absurde e denuklearizimit të të tjerëve dhe duke njohur realitetin, dëshirojnë bashkëjetesë të vërtetë paqësore me ne, nuk ka asnjë arsye që ne të mos përballemi me të”, ka thënë Kim.
Analistët thonë se bisedimet e paqes me Trumpin do të forconin pozicionin e Kim në vend si një udhëheqës botëror dhe do t’u provonin popullit të tij të varfër se ai po mbante një premtim që babai dhe gjyshi i tij nuk ishin në gjendje ta mbanin.
Dyshja mbajtën samite në 2018 dhe 2019 përpara se negociatat të dështonin mbi arsenalin e armëve bërthamore të Phenianit. Koreja e Veriut është nën sanksione të rënda ndërkombëtare për këto armë dhe programin e saj të raketave balistike.
