Kryqi i Kuq ka pranuar se do të duhet kohë për të dorëzuar eshtrat e pengjeve izraelite që mbahen në Gazë, duke e quajtur këtë një “sfidë masive” duke pasur parasysh vështirësitë e gjetjes së trupave mes rrënojave të territorit.
“Kjo është një sfidë edhe më e madhe sesa lirimi i njerëzve të gjallë. Kjo është një sfidë masive”, është cituar nga Reuters të ketë thënë zëdhënësi i Kryqit të Kuq, Christian Cardon.
“Mendoj se ekziston qartë rreziku që kjo të kërkojë shumë më tepër kohë. Ajo që po u themi palëve është se kjo duhet të jetë përparësia e tyre kryesore”, ka shtuar ai.
Sipas tij, mund të duhen ditë ose javë dhe se ekziston mundësia që ata të mos gjenden kurrë.
Mediat ndërkombëtare raportojnë se hapat e ardhshëm për Izraelin dhe Gazën janë të pasigurt, edhe pse presidenti i SHBA-së Donald Trump këmbëngul se lufta ka mbaruar dhe faza e parë e marrëveshjes së armëpushimit arriti të kthejë të 20 pengjet e gjalla në Izrael.
Pavarësisht nënshkrimit të një marrëveshjeje për të kërkuar paqe në Lindjen e Mesme, nuk ka një afat kohor për bisedime të tjera të nivelit të lartë, pasi pikat kryesore mbeten të pazgjidhura, raporton CNN.
Autoritetet izraelite kanë identifikuar zyrtarisht trupat e katër pengjeve. Familjet e pengjeve të vdekur kanë thënë se janë “të tronditura dhe të tmerruara” pasi 24 të tjerët nuk u kthyen.
Më shumë se 1,700 të burgosur palestinezë dhe 250 të burgosur janë liruar. Disa të burgosur palestinezë të liruar pretenduan se kanë vuajtur abuzim gjatë vuajtjes së dënimeve të tyre në burgjet izraelite.
Në Gazë, Programi Botëror i Ushqimit ka thënë se synon të rrisë furnizimet me ndihmë në enklavë deri në fund të së martës.
