Izraeli dhe grupi militant palestinez Hamas janë “shumë afër” arritjes së një marrëveshjeje kornizë për t’i dhënë fund luftës në Gaza dhe për të siguruar paqe të qëndrueshme në Lindjen e Mesme, tha të hënën sekretarja e shtypit e Shtëpisë së Bardhë, Karoline Leavitt.
Leavitt, duke folur në programin “Fox and Friends” të Fox News, theksoi se presidenti Donald Trump do të diskutojë një plan paqeje prej 21 pikash me kryeministrin izraelit Benjamin Netanyahu në Shtëpinë e Bardhë më vonë të hënën.
Trump do të flasë me udhëheqësit në Katar, të cilët kanë shërbyer si ndërmjetës me Hamasin, të hënën, ka bërë të ditur ajo, shkruajnë mediat e huaja.
Sipas saj, “për të arritur një marrëveshje të arsyeshme për të dyja palët, të dyja palët duhet të dorëzohen pak dhe mund të largohen nga tryeza paksa të pakënaqura, por në fund të fundit kjo është mënyra se si do ta përfundojmë këtë konflikt”.
Siç kujtojnë mediat, presidenti i SHBA-së, Donald Trump do të shtyjë përpara një plan të ri paqeje për t’i dhënë fund luftës Izrael-Gaza gjatë bisedimeve në Shtëpinë e Bardhë me kryeministrin izraelit Benjamin Netanyahu të hënën.
Trump ka folur për perspektivat e arritjes së një marrëveshjeje, duke u thënë gazetarëve të premten: “Mendoj se kemi një marrëveshje”.
Por Netanyahu tha të dielën se “nuk është finalizuar ende”, ndërsa Hamasi tha se nuk i ishte dërguar zyrtarisht propozimi.
