Rindërtimi pas tërmetit të 26 nëntorit në Shqipëri ende është larg përmbylljes.
Pas dhjetëra aftësh të shtyra, së fundmi qeveria ka vendosur në dispozicion të procesit 5 miliardë lekë të tjera.
Kjo shumë tejkalon përllogaritjet edhe qeverisë shqiptare për “rreth 1 miliardë euro nevoja”, raporton A2, transmeton Klankosova.tv.
Të dhënat nga Ministria e Financave tregojnë se nga fillimi i vitit e deri në fund të shtatorit, nga buxheti i shtetit kanë dalë 7.2 miliardë lekë, kryesisht për rindërtimin e pallateve. Kjo shumë është sa 78 për qind e buxhetit total të këtij viti.
Të dhënat tregojnë se nga viti 2020 e deri më tani kanë dalë nga buxheti i shtetit rreth 104.5 miliardë lekë totalin e fondeve dedikuar “rindërtimit”.
Shuma e lartë u detyrua të dalë nga buxheti i shtetit pasi një pjesë e mirë e fondeve të premtuara në “Konferencën e Donatorëve” nuk u arritën të merreshin, shkruan A2, përcjell Klankosova.tv.
Që nga viti 2020, kur nisi procesi e deri më tani rezulton të jenë rindërtuar në total 2 mijë e 250 banesa individuale dhe 4 mijë e 500 apartamente.
Deri në fund të vitit planifikohet të përmbyllen punimet edhe në 105 pallate në ndërtim për të shënjuar kështu fundin e “Rindërtimit pas tërmetit.”
Shqipëria veriperëndimore u godit nga një tërmet i fortë me magnitudë 6.4 shkallë me një epiqendër 16 kilometra në perëndim-jugperëndim të Mamurrasit, mëngjesin e 26 nëntorit 2019.
11 bashki u prekën, duke përfshirë dy nga më të mëdhatë e të populluarat si Tirana dhe Durrësi. Pasojat u ndjenë, gjithashtu, në bashkitë e Shijakut, Krujës, Kamzës, Kavajës, Kurbinit, Lezhës, Rrogozhinës dhe Mirditës.
Në total 51 njerëz mbetën të vdekur nga tërmeti dhe mbi 3 mijë persona u lënduan.
