Trump telefonon Zelenskyn – dyja palët tregojnë se çfarë biseduan

Kandidati republikan amerikan për president, Donald Trump deklaroi se pati një “bisedë shumë të mirë” me presidentin ukrainas, Volodymyr Zelensky dhe se i premtoi se do t’i jepte fund luftës në Ukrainë përmes negociatave.

Zelensky gjithashtu konfirmoi bisedën me kandidatin republikan për president të SHBA-së dhe shprehu mirënjohjen për ndihmën ushtarake të SHBA-së. Por, në mesazhin në platformën X, ai nuk përmendi përpjekjet për t’i dhënë fund konfliktit 28-mujor.

Trump ka thënë se do t’i japë fund luftës në Ukrainë para se të marrë detyrën në janar nëse fiton zgjedhjet e 5 nëntorit. Ai tha gjithashtu se nëse do të kishte qenë në detyrë kur Kremlini dërgoi trupa në Ukrainë në shkurt të vitit 2022, nuk do të kishte pasur luftë.

“Të dyja palët do të jenë në gjendje të takohen dhe të negociojnë një marrëveshje që do t’i japë fund dhunës dhe do të hapë rrugën drejt të ardhmes”, tha Trump.

Megjithëse Trump ka bërë pak propozime të prekshme politikash, ai i tha reuters në një intervistë vitin e kaluar se Ukrainës mund t’i duhet të heqë dorë prej disa territoreve për të arritur një marrëveshje paqeje.

Ndërkohë, Zelensky e uroi Trumpin për kandidaturën ndër republikanët dhe dënoi atentatin ndaj tij.

“I urova forcë dhe siguri absolute në të ardhmen. Pashë mbështetjen jetike dypartiake dhe dydhomëshe amerikane për mbrojtjen e lirisë dhe pavarësisë së kombit tonë”, tha lideri ukrainas.

Ukraina, tha ai, “do t’i jetë gjithmonë mirënjohëse Shteteve të Bashkuara për ndihmën e tyre në forcimin e aftësisë sonë për t’i rezistuar terrorit rus. Sulmet ruse në qytetet dhe fshatrat tona vazhdojnë çdo ditë”.

Ndryshe, Zelensky refuzon çdo negociatë me Rusinë për t’i dhënë fund konfliktit për sa kohë që trupat ruse mbeten në Ukrainë.

Presidenti ukrainas ka propozuar një plan paqeje, të paraqitur sërish në një “samit botëror” muajin e kaluar, në të cilin Rusia nuk ishte e ftuar, i cili kërkon tërheqjen e trupave ruse dhe kthimin e kufijve post-sovjetikë të Ukrainës nga viti 1991.

ARTIKUJ TË NGJASHËMMË SHUMË NGA AUTORI