Ministri i Brendshëm në Shqipëri, Taulant Balla njoftoi se automjetet luksoze të cilat përdoreshin nga anëtarë të organizatave kriminale, të konfiskuara, apo edhe të sekuestruara, do t’i kalojnë Policisë së Shtetit për të përmbushur nevojat e saj.
Ministri Balla, së bashku me Drejtorin e Përgjithshëm të Policisë së Shtetit, Muhamet Rrumbullaku inspektuan mjetet luksoze të konfiskuara.
Balla theksoi se, mjetet e shpejta do të përdoren nga Policia Rrugore, ndërsa mjete të tjera do t’i kalojnë Repartit RENEA për operacionet e tyre.
“Mjete apo prona të paluajtshme të krimit apo korrupsionit, të konfiskuara, nuk do të nxirren më në shitje, për të parandaluar rikthimin e tyre tek të njëjtët, por do të përdoren për nevoja të shtetit”, shtoi Balla.
