Policia e Kosovës bën të ditur se ka realizuar udhërarrestin e lëshuar nga Gjykata Themelore e Prishtinës kur arrestoi kryetarin e Partisë Socialdemokrate, Dardan Molliqaj.
Policia nëpërmjet një kumtese për media ka njoftuar po ashtu edhe për arrestimin e tre anëtarëve të tjerë të PSD-së, për pengim të kryerjes së detyrës zyrtare nga ana e policëve, njofton Klankosova.tv.
“Policia e Kosovës (PK), bazuar në urdhër arrestin e lëshuar nga organet e drejtësisë, sot në orët e pasdites në rrugën ‘Agim Ramadani’ në Prishtinë, ka arrestuar personin D.M, i cili ishte në kërkim. Njësitet policore, po ashtu kanë arrestuar edhe tre persona (F.K, Z.H, G.K,) të cilët kanë penguar zyrtarët policorë gjatë kryerjes së detyrës zyrtare, të cilët kanë tentuar t’u pamundësojnë zyrtarëve policorë zbatimin e urdhër arrestit” thuhet në njoftim.
Tutje thuhet se të gjitha veprimet e zyrtarëve policorë janë realizuar konform autorizimeve ligjore, përderisa veprimet e mëtejme do të ndërmerren në bashkëpunim dhe koordinim me organet e drejtësisë.
