Kryetari i AAK-së, Ramush Haradinaj, ka uruar popullin dhe ushtrinë amerikane në 247 vjetorin e themelimit.
Ai, përmes një postimi në Facebook, tha se ushtria e ShBA-së mbron lirinë, demokracinë, paqen dhe sigurinë në botë.
Në urimin e tij Haradinaj ka falënderuar ushtrinë dhe institucionet amerikane për ndihmën që i kanë dhënë dhe që vazhdojnë t’i japin shtetit të Kosovës.
“Ushtria e Shteteve të Bashkuara të Amerikës, mbron lirinë, demokracinë, paqen dhe sigurinë botërore. Sot në 247-vjetorin e themelimit të saj, kujtojmë sakrificën, trimërinë dhe përkushtimin e burrave dhe grave që shërbyen e shërbejnë në këtë ushtri dhe që janë bërë frymëzim për ushtritë dhe demokracitë në botë. Në këtë ditë historike, urojmë popullin, Ushtrinë dhe institucionet amerikane, me falënderim dhe mirënjohje të thellë për ndihmën që i dhanë Kosovës dhe popullit të saj në momentet vendimtare historike dhe për mbështetjen që vazhdojnë të ofrojnë për një Kosovë e rajon më stabil e më të sigurt”.
Haradinaj tha se është krenari që Ushtria e Kosovës qëndron përkrah asaj amerikane, njofton Klankosova.tv.
“Krenar që Ushtria jonë qëndron përkrah tyre në shumë misione të paqes, me shpresën që të bashkëpunojmë edhe më ngushtë në Aleancën Veriatlantike NATO. Urime ditëlindja! #247 U.S.ARMY”.
