A mund të ketë vaksina efekte të padëshirueshme dhe para se të vaksinohemi kundër Covid-19 a duhet të bëjmë kontrolle shtesë? Këto janë pyetjet që brengosin shumë qytetarë, pak kohë përpara se vaksina të arrijë edhe në vendin tonë. Infektologu Fadil Cana për TV21 thotë se vaksinat që janë në qarkullim janë shumë të sigurta por të njëjtat nuk kanë efekt nëse pranohen pasi të jeni infektuar. Ai tha se personat që e kanë kaluar virusin, si kategori e veçantë nuk janë prioritet në pranimin e vaksinës. E për atë se sa do të zgjas imuniteti i qytetarëve që do të pranojnë vaksinat mjeku Fadil Cana tha se ende nuk dihet sa zgjat efekti mbrojtës i të njëjtave.
“Normal që vaksina në fazë akute të infeksionit nuk mund të pranohet, personat të cilët e kanë kaluar infeksionin me Covid-19, nga ajo që dihet deri tash dhe nga ajo që rekomandohet, nuk mohohet që të vaksinohet por nuk janë prioritet dhe ata në tremujorshin, nga ajo që deri tani kanë mundur dëshmitë shkencore nga lëmia mjeksore në lidhje me koronavirusin të tregojnë që, ajo kategori në tremujorin e parë mundet që në mënyrë komode të pres dhe të kenë një prioritet personat që janë në grupet e riskut”, tha për TV21, infektologu, Fadil Cana.
Por a duhet të vaksinohen shtatzënat dhe lehonat?
“Të tre vaksinat që janë vendosur të jenë në qarkullim , gjatë hulumtimit dhe studimit të tyre nuk e kanë pasur këtë kategori të të prekurve. Në fakt deri tani nuk ka rekomandim të qartë për vaksinimin e grave shtatzëna, apo grave që janë me gjidhënie. Tani për tani nuk preferohet që ajo kategori e popullatës të vaksinohet”, u shpreh Fadil Cana – infektolog.
Në lidhje me efektet anësore të vaksinave, Cana preferon që të mos shikohen ato pak raste, siç tha ai, që bëjnë përjashtime, por të shihet aspekti pozitiv i vaksinës së Covid-19, e që sipas tij nënkupton fundin e virusit. Fadil Cana deklaroi se edhe ai vetë do të vaksinohet dhe apeloi që të gjithë të veprojnë njëjtë.
“Vaksina është shumë e sigurt dhe për momentin i vetmi mjet luftarak, me të cilin mund të ja shohim fundin pandemisë”, potencoi infektologu, Fadil Cana.
Ministria e Shëndetësisë ka informuar se do të marrë 800,000 doza të vaksinës kundër Covid-19, nga prodhuesi Pfizer. Derisa disa shtete të rajonit kanë nisur vaksinimin, dozat e para te ne pritet të arrijnë në shkurt. Ministri Venko Filipçe tha se në bisedime të drejtpërdrejta me këtë prodhues, siguroi vaksina për tërë vitin 2021. Ndryshe vaksina Pfizer ruhet në frigoriferë në -70 gradë Celsius dhe e njëjta është miratuar nga Administrata e barnave dhe e ushqimit e ShBA-së.
