Një padi është ngritur ndaj një 39-vjeçari nga Kosova në Kroaci për shkelje të rendit dhe qetësisë publike, pasi ai vendosi flamurin e Shqipërisë në fshatin Kastelir.
Lajmin e ka bërë të ditur Departamenti i Policisë së Istrias.
Sipas policisë, “burri e ngriti flamurin sot rreth orës 10:35 të mëngjesit. Hetimi penal i kryer vërtetoi se ai kreu një kundërvajtje sipas nenit 26 të Ligjit për Veprat Kundër Rendit dhe Qetësisë Publike”.
Sipas ligjit në Kroaci, flamuri i një vendi tjetër nuk mund të shfaqet pa një ftesë të përgjithshme nga një organizatë socio-politike ose pa miratimin e autoriteteve kompetente. Autoritetet vlerësuan se kjo “nuk u respektua në këtë rast”.
Ngjarja dyshohet të ketë ndodhur me rastin e lindjes së fëmijës së njërit prej punëtorëve, por disa vendas kanë pretenduar se veprime të ngjashme përsëriten dhe i shohin ato si provokim.
Ngjarja u shënua pikërisht në ditën kur Shqipëria feston 113-vjetorin e pavarësisë.
