Dita Ndërkombëtare e Punëtorëve, e njohur si 1 Maji, ka një histori të gjatë dhe të lidhur ngushtë me luftën për të drejtat e punëtorëve, që daton nga fundi i shekullit XIX njofton agjencia e lajmeve INA.
Fillimi i kësaj dite lidhet drejtpërdrejt me protestat masive të punëtorëve në Shtetet e Bashkuara të Amerikës, konkretisht në qytetin e Çikagos në vitin 1886. Më 1 maj të atij viti, dhjetëra mijëra punëtorë dolën në grevë duke kërkuar një ditë pune 8-orëshe, në një kohë kur shumica punonin deri në 12–14 orë në ditë .
Protestat kulmuan më 4 maj 1886 me ngjarjen e njohur si “Afera e Haymarket-it”, kur një tubim i punëtorëve u përshkallëzua në dhunë pas shpërthimit të një bombe, duke shkaktuar viktima si nga policia ashtu edhe nga protestuesit . Kjo ngjarje u bë simbol i sakrificës së punëtorëve dhe i luftës për të drejta më të mira.
Në vitin 1889, një organizatë ndërkombëtare e partive socialiste dhe sindikatave vendosi që 1 maji të shpallej zyrtarisht si dita ndërkombëtare e punëtorëve, në kujtim të këtyre ngjarjeve . Që nga viti 1890, kjo ditë filloi të shënohej me protesta dhe manifestime në shumë vende të botës
Sot, 1 Maji festohet në dhjetëra shtete si simbol i të drejtave të punëtorëve, solidaritetit dhe përpjekjeve për kushte më të mira pune. Në shumë vende organizohen protesta, marshime dhe aktivitete publike, ndërsa në disa shtete është edhe festë zyrtare.
Megjithatë, ndonëse ka lindur në SHBA, kjo ditë nuk festohet aty më 1 maj, por në shtator, për shkak të zhvillimeve historike dhe politike të kohës.
1 Maji mbetet edhe sot një nga datat më të rëndësishme sociale në botë, duke kujtuar se të drejtat që gëzojnë punëtorët sot janë rezultat i një historie të gjatë sakrificash dhe përballjesh.(INA)
